4 T’AQA
Diosmi Abrahamwan rimanakurqan
Abrahamqa kasukuq allin iñiyniyoq runan karqan, chaymi Jehová Dios prometerqan askha mirayniyoq kananpaq
HATUN paramanta kinsa pachak phisqa chunka wata pasasqanmanmi, Ur qhapaq llaqtapi Abraham sutiyoq runa tiyarqan (chayneqpin kunan Irak nación kashan). Abrahamqa allin iñiyniyoq runan karqan, ichaqa Diosmi pruebaman churarqan.
Jehová Diosmi nirqan Canaán hallp’aman astakunanpaq. Paytaq usqhaylla kasukurqan. Chaymi esposan Sarata, sobrinon Lotta, wasinpi lliw runakunata pusarikurqan. Chayman chayaspan karpakunallapi tiyarqan huk ladokunaman astakuspa. Diosmi Abrahamman prometerqan pachantinpi lliw familiakuna payrayku allin qhawarisqa kanankupaq, mirayninpas hatun llaqtaman tukupuspa Canaán hallp’ata hap’ikapunankupaq.
Abrahampas Lotpas askha uywakunayoqmi karqanku. Abrahamqa sumaq sonqon karqan, chaymi sobrinonta nirqan munasqan hallp’ata akllakunanpaq. Hinan Lotqa Jordán mayu pampapi hallp’ata akllakurqan, Sodoma llaqtaq ladonpitaqmi tiyarqan. Chay llaqtapi runakunaqa qhelli huchapin kawsarqanku, chaywanmi Diosta phiñachirqanku.
Abrahamwan Lotwan t’aqanakusqanku qhepamanmi Jehová Dios Abrahamman prometerqan hanaq pachapi ch’askakuna hina askha mirayniyoq kananpaq. Payqa iñirqanmi chay promesapi, ichaqa mana wawayoqmi karqanku. Abraham 99 watayoq kashaqtin esposantaq yaqa 90 watayoq kashaqtinmi Dios willarqan wawayoq kanankuta. Chaymi Saraqa wawayoq kapurqan, chay wawatan suticharqanku Isaac nispa. Qhepamanqa askha wawayoqmi Abrahamqa karqan, ichaqa Isaacpa familianmantan prometesqa Miray hamunan karqan.
Lotqa familiantinmi Sodoma llaqtapi tiyasharqanku, ichaqa manan chaypi qhelli kawsaq runakuna hinachu kawsarqan. Chaymi Jehová Dios chay llaqtata ch’usaqyachinan kaqtin, angelkunata kacharqan Lotman willamunankupaq. Paykunan kamachirqanku usqhaylla familiantin ayqenankupaq, qhepankuta ama qhawarikunankupaqpas. Chay qhepamanmi Dios ninata azufretawan parachimurqan, chhaynapin Sodoma Gomorra llaqtakunapi runakuna wañurqanku. Lotwan iskaynin ususinkunallawanmi mana wañurqankuchu. Esposanmi ichaqa qhepanta qhawarikurqan, yaqapaschá imaymana saqesqan kaqninkunata munapayaspa, chaymi mana kasukusqanrayku wañurqan.