¿Imatataq yachakuntsik tesalonicensis cristiänukunata apostol Pablu ninqampita? Imatapis shumaqtanö o espantakuypaqtanö willamashqa o Bibliawan yachakunqantsikpita jukläya kaptinqa, alläpam cuidakunantsik. Unë Union Soviëticachö pasanqampaq parlarishun. Gobiernupaq trabajaq nunakunam Jehoväpa testïgunkunapa principal oficïnampa jutinchö cartata qellqëkur wawqi panikunata entregayarqan. Tsë cartachöqa niyarqan Jehoväpa testïgunkunapita rakikärir juk grüputa rurayänampaqmi. Tsë carta rasumpanö kaptimpis, Bibliawan yachakuyanqampita jukläya kanqanta cuentata qokurmi wawqi panikunaqa creiyarqantsu. Kanan witsampis, chikimaqnintsikkunaqa Internet-ta y juk cösaskunatam utilizäyan pantatsimänantsikpaq o rakikätsimänantsikpaq. Tsëkuna pasakuptinqa, alli ‘juiciuyoqmi’ kanantsik y yachakunqantsikkunawan igualanqanta o mana igualanqantam raslla o saslla cuentata qokunantsik (2 Tes. 2:2; 1 Juan 4:1). w24.07 päg. 12 pärrk. 14, 15

Llapantsikpis cada junaq imëkata decidintsik. Peru juk nuna Jehoväta sirwinampaq y sirweqninkunawan juntu kanampaq decidinqanmi, imata decidinqampitapis mas alliqa. Y tsëta decidiyänantam Jehoväqa munan. ¿Imanirtan tsëta munan? Pëqa munan amïgun karnin imëyaqpis kushishqa kawakuyänantam (Deut. 30:19, 20; Gäl. 6:7, 8). Jehoväqa manam pitapis obligantsu sirweqnin kayänampaq; tsëtaqa cada nunam decidinan. Peru ¿imatan pasakunman juk cristiänu alläpa jutsata rurariptinqa? Mana arrepentikurqa, manam congregacionchö këta puëdinqanatsu (1 Cor. 5:13). Peru congregacionpita rakishqa kaptimpis, Diosnintsikqa alläpam munan tsë jutsa ruraq kutimunanta. Tsëta munarmi Jehoväqa Tsurin Jesusta kë Patsaman mandamurqan arrepentikoqkunata perdonanampaq. Jehovä Diosnintsikqa alläpa kuyakoqmi, tsëmi jutsata ruraqkunata yanapan y arrepentikuyänampaq animan (Zac. 1:3; Rom. 2:4; Sant. 4:8). w24.08 päg. 14 pärrk. 1, 2

Apostol Juan kima kaq cartata qellqanqan witsanqa, wakin cristiänukunaqa mana allikunata yachatsikurmi wawqi panikunata rakikëkätsiyarqan. Peru wakin cristiänukunaqa Jehoväta cäsukurmi yachakuyanqannö kawëkäyarqan (2 Juan 4, 6). Tsë cristiänukunata tsënö kawaqta rikarqa, Juanqa alläpam kushikurqan; tsënöllam Jehoväpis alläpa kushikurqan (Prov. 27:11). ¿Imatataq yachakuntsik apostol Juan qellqanqampita? Jehoväta cäsukurqa, kushishqa kawakunapaq kaqtam (1 Juan 5:3). ¿Manaku alläpa kushikuntsik imanö kawanqantsikpita Jehovä kushikunqanta musyar? Jehoväqa alläpam kushikun rasumpa kaqta yachakushqa y tentacionkunaman mana ishkishqa. Tsënöllam angelkunapis alläpa kushikuyan (Lüc. 15:10). Y noqantsikpis alläpam kushikuntsik wakin cristiänukuna tentacionkunapa pasëkarpis, Jehovä munanqannö kawakuyaptin (2 Tes. 1:4). Kë munduta gobernaq Satanas ushakäriptinqa, alläpam kushikushun Jehovä mandakunqankunata cäsukur kawakunqantsikpita. w24.11 päg. 12 pärrk. 17-18