Jehoväpa sirweqninkunataqa yanapanakuymi gustamantsik (2 Cor. 8:4). Peru yanapanakunapaqqa, höraqa valientim kanantsik. Këllaman pensarishun: guërra kaptinqa, wawqi panikunaqa llapan wanayanqankunachö, hasta Diospa kaqchöpis yanapayänantam wanayan, y anciänukunaqa tsëtam alli musyayan. Tsëmi yanapayänampaq peligrösu kaptimpis wawqi panikunataqa, kuyarnin llapan puëdiyanqanmannö yanapayan. Imanö ruranapaq nimanqantsikkunata, mana allikunapa pasëkarpis cäsukunqantsikqa unïdu kanapaqmi yanapamantsik. Tsëmi sucursalpita nimanqantsiknölla ruranantsik (Heb. 13:17). Anciänukunaqa, desgraciakuna kaptin imakunata rurayänampaq niyämunqankunatam seguïdu leyirëkäyänan (1 Cor. 14:33, 40). Valienti kashun, peru imatapis llutaqa rurashuntsu (Prov. 22:3). Imatapis alli pensëkurmi ruranantsik y manam llutaqa peligruman churakänantsiktsu. Pëqa llapantsikpaqmi yarpachakun y alli kanantsiktam munan. Pëmi yanapamäshun peligrukunapa pasëkaq wawqi panikunata yanapanantsikpaq. w24.07 päg. 4 pärr. 8; päg. 5 pärr. 11

Davidqa Jehoväta allim reqeq y pëmanmi confiakoq. Gobernanti Saul y wakin nunakunapis wanutsiyänampaq qatikachäyaptinmi, Davidqa yanapanampaq Teyta Diosman mañakurqan. Y mañakunqanta Jehovä contestaptinmi y yanapaptinmi kënö nirqan: “¡Teyta Jehovällam kawaq Diosqa!” (Sal. 18:46). Tsënö nirqa, manam kawaq Dios kanqanllapaqtsu David parlëkarqan. Juk librum nin, sirweqninkunata Dios imëpis yanapanqanman confiakurnin David tsënö ninqanta. Davidqa kutin kutinmi rikarqan Jehovä yanapanqanta y tsëmi Jehoväman mas confiakurqan y imëpis alabarqan (Sal. 18:28, 29, 49). Jehovä kawëkaq Dios kanqanta següru kanqantsikqa, ¿imanötan yanapamantsik? Diosnintsikta kushishqa sirwinapaq, sirwirnin alli trabajanapaq, sirwita mana dejarinapaq y problëmakunapa pasarnin alli aguantanapaq. w24.06 pägk. 20, 21 pärrk. 3, 4

¿Imatataq yachakuntsik tesalonicensis cristiänukunata apostol Pablu ninqampita? Imatapis shumaqtanö o espantakuypaqtanö willamashqa o Bibliawan yachakunqantsikpita jukläya kaptinqa, alläpam cuidakunantsik. Unë Union Soviëticachö pasanqampaq parlarishun. Gobiernupaq trabajaq nunakunam Jehoväpa testïgunkunapa principal oficïnampa jutinchö cartata qellqëkur wawqi panikunata entregayarqan. Tsë cartachöqa niyarqan Jehoväpa testïgunkunapita rakikärir juk grüputa rurayänampaqmi. Tsë carta rasumpanö kaptimpis, Bibliawan yachakuyanqampita jukläya kanqanta cuentata qokurmi wawqi panikunaqa creiyarqantsu. Kanan witsampis, chikimaqnintsikkunaqa Internet-ta y juk cösaskunatam utilizäyan pantatsimänantsikpaq o rakikätsimänantsikpaq. Tsëkuna pasakuptinqa, alli ‘juiciuyoqmi’ kanantsik y yachakunqantsikkunawan igualanqanta o mana igualanqantam raslla o saslla cuentata qokunantsik (2 Tes. 2:2; 1 Juan 4:1). w24.07 päg. 12 pärrk. 14, 15