¿Pitaj Dios?

Ashkha runas Diospi creesqankuta ninku. Jinapis “¿pitaj Dios?” nispa tapojtinchej mana kikintachu kutichinku. Wakenqa ninku: “Diosqa pantasqallanchejta qhawashan castiganawanchejpaj”, nispa. Wakintaj ninku: “Diosqa may munakuyniyoj Tata, imata ruwajtinchejpis perdonallawanchej”, nispa. Wakintajrí ninku: “Diosqa qonqakuwanchej. ¿Imatá noqanchejmanta llakikonqari?”, nispa. Chayrayku ashkha runas ninku Diosta mana rejsiyta atisqanchejta.

¿Diosta rejsinapunichu kanman? Arí. Diosta sumajta rejsispaqa, imapajchus kausasqaykita sutʼita yachanki (Hechos 17:26-28). Diosman astawan qayllaykojtiykitaj, payqa astawan munakusonqa, yanapasonqataj (Santiago 4:8). Chantapis Diosta allinta rejsispaqa, wiñay kausayta japʼinki (Juan 17:3).

¿Imaynapitaj Diosta rejsiwaj? Sumaj amigoykipi piensariy. ¿Imaynapitaj amigoykiman tukorqa? Ñaupajtaqa sumajtarajchá rejsinakorqankichej. Sutinta yacharqanki, imaynachus kasqanta, imachus gustasqanta, imastachus ruwasqanta, imastachus ruwayta munasqanta ima. Ajinapi sumaj amigosman tukorqankichej.

Diosninchejtapis ajinallatataj rejsisunman. Chaypajtaj kay tapuykuna yanapawasun:

• ¿IMATAJ DIOSPA SUTIN?

• ¿IMAYNATAJ DIOS?

• ¿IMASTATAJ DIOS RUWARQA?

• ¿IMASTATAJ DIOS RUWANQA?

• DIOSTA REJSIY, ¿YANAPASUNKIMANCHU?

Kay revistaqa chay tapuykunaman Bibliawan kutichishan. Ñaupajtaqa pichus Dios kasqanta yachakunki. Chantataj paypa amigon kaspa ima bendicionestachus japʼinaykita yachakunki.