Isaías libroqa sonqochawanchej

1, 2. ¿Imatá Jehová ruwan llakisqa kashajtinchej?

UJ WAWA sonqo nanayta waqashasqanpi piensarina. Ichapis payqa llakisqa kashan familian waj ladoman ripushasqanrayku, chayraykutaj pay amigosninta saqenan kasqanrayku. Chayri imatapis mana allinta ruwarpasqanrayku sinchʼi llakisqa kashan. Ajina kajtin, ¿imatá maman ruwanqa? Abrazaykonqa, sumajta uyarenqa, mayta munakusqantataj nenqa.

² Bibliapi Jehovaqa, wawanta sonqochaj munakuyniyoj mamawan kikinchakun. Isaías 66:13 versiculopi pay niwanchej: “Imaynatachus mamaqa wawanta sonqochan, ajinallatataj qankunatapis sonqochallasqaykichejpuni”, nispa. Uj tata chayri uj mamaqa wawanta maytapuni munakun. Jehovatajrí mayqen tatamantapis chayri mayqen mamamantapis astawanraj munakuwanchej (Isa. 49:15). Llakisqa kashajtinchej chayri sufrishajtinchej Jehovaqa Palabranwan sonqochawanchej, necesitasqanchej kallpatataj qowanchej (Rom. 15:4).

3. ¿Imatá kay yachaqanapi qhawarisunchej?

³ Jehovaqa Isaías libropi ashkha imasta niwanchej, chaytaj mayta sonqochawasunman (Isa. 40:1). Uj pacha Judá nacionqa sinchʼi llakiypi kasharqa. Jehovataj Isaías librota qhelqacherqa chaypi kaj kamachisninta kallpachananpaj. Noqanchejpis ‘may llakiy, may sajra’ tiempospi kausakushanchej, chayraykutaj sonqochayta necesitanchej (2 Tim. 3:1). Chayrayku kay yachaqanapeqa qhawarisunchej Isaías libromanta wakin versículos imaynatachus kay kinsa imaspi kallpachayta atiwasqanchejta. 1) Kausayninchej kaymanta jinalla cambiajtin. 2) Ñaupajpi juchallikusqanchejmanta sonqonchej mayta juchachawajtinchej. 3) Pinillanchejpis wañupojtin.

KAUSAYNINCHEJ KAYMANTA JINALLA CAMBIAJTIN

4. ¿Imayná sientekusunman kausayninchej kaymanta jinalla cambiajtin?

⁴ Kausayninchejqa kaymanta jinalla cambianman (Ecl. 9:11; 1 Cor. 7:31). Ichapis mana suyasqallamanta onqoykusunman, qolqe pisiwasunman, tiyakunchej chaypi politicarayku chʼajwas kanman, chayri uj asignacionmanta cambiawasunman. Chay imaspi rikukuspaqa mayta llakikusunman, nitaj yachasunmanchu imatachus ruwananchejta. Chayraykutaj tapukusunman: “¿Kunan imatá ruwasajri?”, nispa. Hermanonchej Joseph ajinapi rikukorqa. 17 watastaña Betelpi sirvisqantawan asignacionnin cambiarqa. Pay nin: “Ashkha watastaña Betelpi sirvisqayrayku, mana atillarqanichu waj jina kausayman yachaykukuyta. Mana yacharqanichu imatachus ruwanayta, imachus noqawan kanantapis”, nispa. Chay imaspi rikukojtinchej, ¿imaynatá Jehová sonqochawanchej Isaías librowan?

5. ¿Imatá Jehová niwanchej Isaías 42:16 versiculopi? (Fototawan qhawariy).

⁵ (Isaías 42:16 leey). Jehová nin “ciegosta mana rejsisqanku ñanninta” pusananta, laqhatapis kʼanchayman tukuchinanta. Chay versiculopi nin: ‘ciegos’, ‘mana rejsisqa ñankunas’, ‘laqha’, ‘meqʼa meqʼa jallpʼas’ nispa. Chay palabrasqa piensarichiwanchej kausayninchej kaymanta jinalla cambiajtin imaynachus sientekusqanchejpi. Ajinapi rikukuspaqa, may laqha montespipis mana rejsisqanchej ñankunasninta purishasunman jina sientekunchej. Jinapis Jehovaqa niwanchej imapi rikukojtinchejpis ladonchejpipuni kananta pusanawanchejpaj. Payqa makinchejmanta aysawasun, ñanninchejtapis kʼanchanqa, pampitamantaj tukuchenqa. Chaytataj ruwanqa Palabrannejta, llajtannejta sumaj yuyaychaykunata qospa (Sal. 119:105; Isa. 30:21). Chantapis hermanoswan, waj runaswanpis yanapachillawanchejtaj. Imachus qhepaman pasanawanchejta mana yachaspapis, atienekuyta atinchej Jehová yanapanawanchejpipuni, imajtinchus payqa munakuwanchej, entiendentaj imaynachus sientekusqanchejta (Isa. 41:10; 1 Ped. 5:6, 7).

6. Kausayninchej kaymanta jinalla cambiajtinpis, ¿imamantataj seguros kashanchej?

⁶ ¿Imataj karqa hermanonchej Josephwan? Paywan señoranwan niwanchej Betelmanta llojsipusqankutawan imaynatachus Jehová paykunata yanapasqanta, munakuynintapis rikuchisqanta. Pay nin: “Jehovaqa tukuy imapipuni yanapawarqayku. Payqa hermanoswan yanapachiwarqayku, maychus tiemponpitaj necesitasqayku imasta qowarqayku, kallpachawarqayku ima. Kunankamapis ajinata yanapashallawaykupuni”, nispa. Noqanchejmanpis kausayninchej kaymanta jinalla cambiajtin, Jehovaqa kallpata, necesitasqanchej yanapatapis qowasunpuni, imapichus rikukusqanchej mana atipanapaj jina kasqanta yuyajtinchejpis (Isa. 54:10; 58:11). Joseph nillantaj: “Diospa llajtan qowasqanchej takiykunamanta ujnin takiypi imatachus nisqan mayta kallpachawan. Chaypi nin: ‘Diosniy noqawan kashan, cuidawanqa pay’, nispa.a Mana yachanchejchu imachus qʼaya kananta, ichapis wakin imasqa mana yuyasqanchejman jinachu llojsenqa. Jinapis imapi rikukojtinchejpis Jehovaqa noqanchejwanpuni kanqa”.

SONQONCHEJ ANCHATA JUCHACHAWAJTINCHEJ

7. Ñaupajpi juchallikusqankurayku, ¿imayná wakin sientekunku?

⁷ Jatun juchapi urmajtinchej, chaytataj rimarejtinchej ancianosqa munakuywan yanapawanchej, chaymantapachataj kallpachakunchej manaña chay juchapi urmanapaj (Pro. 28:13; Sant. 5:14-16; 1 Juan 1:9). Jinapis ichá sonqonchejqa sigue juchachallawanchejpuni. Chayraykutaj yuyanchej: “Jehovaqa kay ruwasqaymanta ni jaykʼaj perdonawanqachu”, nispa (2 Cor. 2:7). Wakin kutisqa ajina pasawasunmanpuni. Imajtinchus imastachus ruwasqanchejtaqa mana qonqayta atillasunmanchu, chayraykutaj sonqonchej juchachallawasunmanpuni. Rey Davidpis kayta nerqa: “Juchallikusqayrayku manapuni allinchu kashani”, “cuerpoyqa tunuyasqa kashan, qʼala tʼunasqataj”, nispa (Sal. 38:3, 8). Ajina sientekunchej chayqa Isaías libro mayta sonqochawasunman.

8, 9. ¿Imatá Isaías 1:18, niwanchej Jehovaj perdonninmanta?

⁸ (Isaías 1:18 leey). Jehovaqa uj kikinchaywan entiendechiwanchej imaynatachus perdonawasqanchejta. Payqa niwanchej ‘juchasninchej ancha puka kajtinpis, ritʼita jina yurajman tukuchinanta’. Chay puka colorqa allin fuertepuni, chaywan uj ropata tiñiykojtinchejqa mana orqhoyta atillasunmanchu. Jinapis Jehovaqa niwanchej juchasninchejta perdonaspa tukuysituntapuni perdonasqanta, nisunman tukuysituntapuni picharqosqanta.

⁹ Watejmanta rey Davidmanta parlarina. Jehovaqa Davidta perdonarqa khuchichakuy juchapi urmajtinpis, chantá runata wañuchejtinpis. Tiemponmantaj nerqa Davidqa payta llimphu sonqowan sirvisqanta (2 Sam. 11:3, 4, 14, 15; 12:13; 1 Rey. 9:4, 5). Jehovaqa paymanta yuyarikojtin mana pantasqasninpichu yuyaj, manaqa payta tukuy sonqo sirvisqanpi. Noqanchejwanpis ajinallatataj ruwan. Munakuyniyoj tatanchej Jehovaqa arrepientekojtinchej perdonawanchej. Yanapawanchejtaj manaña sonqonchej juchachanawanchejpaj, llimphu sonqowantaj payta sirvinanchejpaj. Jinapis ñaupa juchasninchejmanta sonqonchej juchachallawanchejpuni chay, ¿Isaías libromanta ima versiculotaj yanapallawasunmantaj? Chayta qhawarina.

10. ¿Ima sonqochaytataj tarinchej Isaías 38:17 versiculopi?

¹⁰ (Isaías 38:17, sutʼinchaynintawan leey). “Tukuy juchasniyta qonqayman churanki” nisqa palabrasqa traducikullanmantaj, “tukuy juchasniyta ñaupaqeykimanta chinkachinki” nispa. Kay versiculoqa yachachiwanchej Jehovaqa juchasninchejta karuman choqasqanta, ujtawan mana rikunanpaj jina, nitaj yuyarikunanpaj jina. Bibliamanta sutʼinchaj uj diccionario nisqanman jina, chay palabrasqa kay jinamantapis nikullanmantaj: “Juchasniytaqa chinkachinki, ni jaykʼajpis juchallikuymanchu karqa ajinata”, nispa. Waj parlaypi nisunman Jehovaqa juchasninchejta perdonaspa, ni jaykʼaj juchallikoj runaman jina tukuchiwanchej. Chantapis ni jaykʼaj juchanchejmanta yuyarichiwasunchu, nitaj chaymanta castigawasunchu, imajtinchus payqa niwanchej: “Juchasniykimantapis manaña yuyarikusajñachu”, nispa (Isa. 43:25). Chayqa mayta sonqochawanchej. Aswan Patapi kaj Juez Jehová juchasninchejta qonqapun chay, noqanchejqa astawanraj juchasninchejta qonqapunanchej tiyan, niñataj chaymanta mal sientekunallapunichu tiyan.

11. ¿Imatataj Jehová astawan qhawan? (Fototawan qhawariy).

¹¹ Watejmanta sonqonchej juchachayta qallariwanchej chayqa, yuyarikuna Jehová mayta munakuwasqanchejta, perdonasqatataj perdonawasqanchejta. Payqa ñaupajpi ima juchastachus ruwasqanchejmanta mana pʼenqakuwanchejchu, nitaj runas jina chay yuyarisqallapunichu kashan (Isa. 57:16). Jehovaqa astawan qhawan imastachus kunan ruwashanchej chayta, imastachus aswan qhepaman ruwasun chaytapis, manataj ima juchastachus aswan ñaupajpi ruwarqanchej chaytachu (Isa. 55:7). Jehová mayta munakuwasqanchej, perdonawasqanchejpis tʼukunapaj jinapuni. Yuyarikunapuni Jehová mayta munakuwasqanchejta, amataj ñaupa juchasninchejmanta llakikunallapunichu, nitaj chayrayku Jehovata sirviytapis saqepunachu, nitaj wiñay kausaytapis pierdenachu.

PINILLANCHEJPIS WAÑUPOJTIN

12. ¿Imayná sientekunchej pinillanchejpis wañupojtin?

¹² Pinillanchejpis wañupojtenqa maytapuni llakikunchej, chaytaj mana chay ratochu pasan. Wakin kutisqa ichá ninchej: “¿Imaraykutaj Jehová wañupunanta saqerqari?”, nispa. Michael sutiyoj hermanonchej ajinapi rikukorqa. Paypa tatasnenqa nina japʼiykukusqanrayku wañuporqanku. Pay nin: “May sinchʼi llakisqapuni kasharqani, Jehovapajtaj phiñasqa kasharqani tatasniy wañupunankuta saqesqanrayku. Yachani mana paychu juchayoj kasqanta. Jinapis ni imata ruwarqachu paykunata salvananpaj”, nispa. Ichá maykʼajllapis ajina sientekorqanchej. Qhawarina imaynatachus Isaías libro sonqochayta atiwasqanchejta, uj suyakuytataj qowasqanchejta.

13. ¿Imatá Jehová niwanchej Isaías 25:8 versiculopi?

¹³ (Isaías 25:8 leey). Jehovaqa nin ‘wañuyta wiñaypaj chinkachinanta’. Wañuy manaña kajtenqa niña pininchejpis wañupusqanmanta ujtawan waqasunchu. Chayqa may sumajpuni kanqa (Isa. 35:10). Niña pinillanchejpaj sutintapis uj lapidapi rikuspa waqarikusunchu. Maytapuni suyakushanchej familiaresninchej, amigosninchejpis ni imamanta onqospa noqanchejwan khuska kausakunankuta. Chaytaqa Tukuy Atiyniyoj Diosninchej niwanchej, manataj uj cuentollachu. Chayrayku chayqa juntʼakonqapuni (Apo. 21:4, 5).

14. ¿Imaynataj sientekunki kausarimuy kananpi piensarispa? (Isaías 26:19; fototawan qhawariy).

¹⁴ (Isaías 26:19 leey). Jehovaqa mana wañuyllatachu chinkachenqa, manaqa familiaresninchejta, amigosninchejtapis kausarichimonqa. Payqa kayta niwanchej: “Ayasneyqa sayarimonqanku”, nispa. Chaywan nishawanchej wañusqasqa paypata kasqankuta. Paykunamantaqa manapuni qonqapunchu, maychus tiemponpitaj kausarichimonqa. Imaynatachus sutʼiyay chhulla qhorasta chayri plantasta kausarichin, ajinallatataj munasqa familiaresninchejta, amigosninchejtapis kausarichimonqa. Paykunata watejmanta rikukapoyqa may sumajpuni kanqa (Marcos 5:42 versiculowan kikinchay).

15. ¿Imaynatá yanapawanchej kausarimuy kananpi tʼukuriy?

¹⁵ Wañupoj familiaresninchejmanta, amigosninchejmantapis Jehová mana qonqapusqanta, kausarichimunantapis yachayqa, llakiyninchejta mana chinkachinchu, jinapis aguantanapaj yanapawanchej. 12 parrafopi hermanonchej Michaelmanta parlarerqanchej. Payqa chayta yachay imaynatachus sonqochasqanmanta nin: “Isaías 26:19 versiculowan entienderqani tatasneyqa Jehovajta kasqankuta. Payqa mayta paykunata munakun. Chayraykutaj mana paykunamanta qonqapunchu, maychus tiemponpipunitaj kausarichimonqa. Chaypi piensareyqa mayta sonqochawan, kallpatapis qowan”, nispa. Ajinallatataj noqanchejpis piensarina wañupoj familiaresninchej, chayri amigosninchej kausarinpojtinku imayna kusisqachus kananchejpi. Chaypi piensarispaqa llakiyninchejta aguantayta atillasun.

16. ¿Ima textotaj sonqochasorqa uj llakiypi kashajtiyki?

¹⁶ Kay yachaqanapi Isaías libromanta wakin versiculosta qhawarerqanchej. Chay versiculosqa maytapuni sonqochawanchej kausayninchej kaymanta jinalla cambiajtin, ñaupajpi juchallikusqanchejmanta sonqonchej anchata juchachawajtinchej, pinillanchejpis wañupojtin ima. Maytapuni Jehovaman agradecekunchej Palabrannejta ajinata sonqochawasqanchejmanta, kallpachawasqanchejmanta ima (Sal. 94:19). ¿Ima textotaj qanta kallpachasunki ima llakiypipis kashajtiyki chayri imapipis rikukojtiyki? Allin kanman chay textota de memoria yachakunayki, qhelqaykunayki, sapa kuti rikunaykipaj jinataj sutʼiman churanayki. Ajinamanta saqenki munakuyniyoj Tatanchej Jehová Palabranwan sonqochasunanta.