Ñaupa tiempopi pescanapaj chʼipas

Yachanchej jina Jesuspa wakin yachachisqasnenqa pescadores karqanku (Mar. 1:16-20). Paykunaqa Galilea mar qochapi chʼipaswan pescaj kanku.

¿Imaynatá chay chʼipasta ruwaj kanku? Hiloswan wataspa uj mallata jina ruwaj kanku, chay hiloqa linomantapuni kayta yachaj. Chay chʼipa juchʼuy pescadosta japʼinapaj kajtenqa, chay mallata juchʼuy juskʼitusniyojta ruwaj kanku. Jatuchaj pescadosta japʼinapaj kajtintaj, jatuchaj juskʼusniyojta ruwaj kanku. Juchʼuy chʼipasqa muyuyninpi plomoyoj chayri rumisniyoj kaj kanku. Ajinamanta choqaykojtinku yakuman chinkaykunanpaj. Yaku ukhunta aysanapaj chʼipastaj aswan jatuchaj kaj kanku, ura kantunpeqa plomosniyoj kaj kanku yakuman chinkaykunanpaj, pata kantunpitaj juchʼuy maderasniyoj, chayri corchoyoj kaj kanku, ajinamanta tuytunanpaj.

Chay chʼipasqa may caro cuestaj, sumajtataj cuidananku kaj. Wakin kutisqa rumi kʼallkasman satʼiykukusqanrayku chayri ashkha pescadota orqhomusqankurayku llikʼirpakoj (Luc. 5:6). Bibliaqa nin uj pacha Santiagowan Juanwan ‘chʼipasninkuta allinchashasqankuta’, ichapis chaytaqa ruwasharqanku agujawan, linomanta hilowan ima (Mat. 4:21). Pescadoresqa sapa pescayta tukuytawansina chʼipasninkuta allinchaj kanku. Chantapis chʼichinta orqhonankupaj sumajta tʼajsarqoj kanku. Lucaspis nin wakin pescadores “pescado japʼina chʼipasninkuta tʼajsasharqanku”, nispa (Luc. 5:2). Chʼakichinankupajtaj warkhurpaj kanku, ajinamanta mana ismuykapunanpaj (Eze. 47:10).

Jesusqa chʼipaswan pescayta yachaj runasta nerqa qhepanta rinankuta, ajinamanta ‘runa japʼej pescadoresman tukuchinanpaj’.