Benaya: Mana manchachikoj kana, nitaj wasanchanachu

Benayaqa mana manchachikoj soldado karqa. Payqa rey Davidta, Salomontawan sirverqa. Benayaqa uj sacerdotej wawan karqa. Sacerdoteswan levitaswanqa mana armasta apaykachajchu kanku, nitaj Jehovaj guerrasninpi maqanakojchu kanku. Benayatajrí chayta ruwarqa, mana manchachikojtaj karqa. Payqa uj kutipi uj leonta uj estanquepi wañucherqa, waj kutipitaj uj jatun soldadota atiparqa. Davidqa Benayapi mayta atienekorqa, chayraykutaj guardiasninta kamachinanpaj churarqa (2 Sam. 23:20-23).

Benayaqa Absalonwan Adoniaswan Davidpa contranpi oqharikojtinkupis, Davidllawanpuni karqa (2 Sam. 8:18; 15:18; 1 Rey. 1:8). David machituña kashajtintaj, Benayaqa Salomonta reyta jina churanankupaj yanapakorqa (1 Rey. 1:32-40). Benayaqa Jehovatapuni kasukorqa, pikunatachus Jehová reyes kanankupaj ajllarqa chaykunatapis mana wasancharqachu, wajkuna wasanchajtinkupis.

Noqanchejpis mana manchachikoj kayta necesitanchej Satanaswan pay jina ruwajkunawan ima maqanakunapaj. Chantapis Jehovaj munasqanman jina kausakuna tiyan (Efe. 6:11; 1 Ped. 5:8, 9). Wajkuna Jehovata sirviyta saqejtinkupis, noqanchejqa Jehovallatapuni sirvisunchej, pay bendecinawanchejmantataj mana iskayrayasunchu (2 Sam. 22:26).