Razonamiento librowan, ¿yanapachikuchkankichu?
1. Jesús, Pablo ima, ¿imaynatá yachachiq kanku?
1 Apóstol Pabloqa, runasman “Diospa Palabranmanta sutʼita” parlananpaq, mayta kallpachakurqa (Hech. 17:2, 3; 18:19, Qheshwa Biblia). Jesusqa, Diospa Palabranwan, rikchʼanachinaswan ima, Diospa munayninta sutʼincharqa, Pablotaq kikinta ruwarqa (Mat. 12:1-12). Kay Razonamiento a partir de las Escrituras libroqa, kikinta ruwananchikpaq yanapawanchik.
2. ¿Imaynatá Razonamiento libro runawan parlayta qallarinapaq yanapawasunman?
2 ¿Imaynatá runawan parlayta qallarinapaq wakichikusunman? Razonamiento librop 9-15 paginaspi, runaman parlayta qallarinapaq, yuyaychaykuna tiyan. Chaymanta yachakusunman, juk kutipi juk yuyaychaywan, wakin kutipitaq wakwanñataq parlasunman, astawanraq maypichus sapa kuti willanchik chaypi. Willaypi tukuy imamanta parlaptinchik, runa uyarinanpaqjina kaptintaq, ichapis aswan runaswan parlayta atisun. Telefononiqta chayri edificiospi intercomunicadorniqta parlaspaqa, libromantapacha ñawiripusunman.
3. Razonamiento libromanta 16-24 paginasnin, ¿imaynatataq willaypi yanapawasunman?
3 Runa mana uyariyta munaptin. Ichá allin kanman, manaraq willayman richkaspa imastachus runa mana uyariyta munaspa nisqanpi, tʼukurinanchik, chantataq 16-21 paginasninmanta wakichikusunman. Jinamanta, sumaqta kutichiyta atisunchik. Maypichus willanchik chaypi, ¿budista, hindú, judío, chayri musulmán religionmanta kaqkunawan tinkukusunmanchu? Jina kaptinqa, kay 21-24 paginaswan yanapachikuna.
4. ¿Imaynatá Razonamiento libro tapuykunaman kutichinapaq yanapawasunman?
4 Imaynatataq tapuykunaman kutichisunman. Razonamiento libroqa, tapuykunaman kutichinapaq chayri juk yachachiyta sutʼinchanapaq yanapawasunman. Kay libromanta sutʼinchayqa, atinapaqjinalla. Kay “Tabla de materias” alfabetomanjina sukʼasqa kasqanrayku, juk tapuyman kutichinapaqqa, chaypi kutichiyta tariwaq, chayman rispataq, yanitapi tapuykunata qhawariy. Mana tariyta atinki chayqa, kay 439 paginamanta ñawpaqman, maskʼayta atiwaq. Chay tapuyman kutichiyta tarispataq, libromantapacha ñawiripuwaq. Bibliamanta juk pʼitip sutʼinchayninta tariyta munaptiykitaq, 445 paginamanta “Textos bíblicos que suelen aplicarse mal”, nisqapi maskʼayta atiwaq.
5. ¿Imaynasmantataq kay Razonamiento libro yanapallawasunmantaq?
5 Wakjinasmanta yanapachikunapaq. Wakinqa, kay Razonamiento librota, yachaywasiman chayri llamkʼayninkuman apanku, kayman rikchʼakuq tapuykunaman kutichinankupaq: “¿Por qué no celebran las fiestas?”. Waynuchusmanqa, “Creación”, “Evolución” nisqa yachachiykuna, yachaywasipi yanapan. ¿Juk unqusqata chayri familianmanta pillapis wañupuq runap wasimanchu riyta yuyachkanki? Chaypaqqa, Bibliamanta sunquchanapaqjina pʼitikunata, kay “Estímulo” nisqa chiqapi tarinki. Razonamiento libroqa, umallirichiykunata wakichinapaq, willayman lluqsinapaq tantakuyta ruwanapaq ima, yanapakullantaq.
6. ¿Imapaqtaq willayman rinchik?
6 Mana runaswan churanakunapaqchu willayman rinchik, nitaq juk yachachiymanta parlanallapaqchu. Manaqa, Diospa Palabranta sumaqta sutʼinchayta munanchik. Chaytataq Razonamiento librowan sumaqta yanapachikuspa, ruwasun, jinamanta imatachus yachachichkasqanchikta sumaqta qhawarichkasqanchikta rikuchisun (1 Tim. 4:16).