Tapuykuna

◼ Diosmanta Parlayta Yachanapaq Tantakuypi, Willayta Yachanapaq Tantakuypi ima, ¿sapa umallirichiypichu tʼaqllakunanchik kanman?

Jehová Diosminchik Jallpʼata ruwaptin, ‘chʼaskas juk kunkallata takichkarqanku, Diospa wawasnintaq janaqpachapi may kusiywan’ tʼaqllakurqanku (Job 38:7). Diospa wawasnin angelesqa, Jehovata jatunchayta munarqanku tukuy imata tʼukunapaqjina ruwasqanmanta, chaytaq Jehovap yachayninta, kʼacha kayninta, atiyninta ima, rikuchirqa.

Ñuqanchikpis, hermanosninchik umallirichinankupaq wakichikusqankumanta, tukuy sunqu pachis nisqanchikta, rikuchinanchik tiyan. Jatun tantakuykunapi, sapa umallirichiy tukukuptin, runaman willachkaspajina rikuchisqankumanta ima, tʼaqllakunchik. Imaptinchus chay tantakuykunapaq wakichikuyqa, tiempo, kallpakuy ima necesitakun, tʼaqllakuspataq, mana umallirichiqllatachu pachis nichkanchik manaqa, Jehová Diostapis pachis ninchik llaqtanniqta, Palabranniqta yachachiwasqanchikmanta (Isa. 48:17; Mat. 24:45, 47).

Chayrayku, Diosmanta Parlayta Yachanapaq Tantakuypi, Willayta Yachanapaq Tantakuypi ima, ¿tʼaqllakusunmanchu? Sunqumantapacha lluqsiptin atisunman tʼaqllakuyta, imaynatachus Bibliamanta yachakuq ñawpaq kutita umallirichiptin tʼaqllakunchik, ajinata. Chaywanpis tʼaqllakuyqa, tiempowan manaña sunqumantapachachu kanman. Chayrayku, mana tʼaqllakunchikchu, sapa umallirichiy tukukuptin.

Diosmanta Parlayta Yachanapaq Tantakuypi, Willayta Yachanapaq Tantakuypi ima, ichapis mana sapa umallirichiy tukukuptin tʼaqllakusunchu, chaywanpis, sumaqta uyarispa, mana puñuspa ima, umallirichiqta pachis nisqanchikta, rikuchinchik. Tantakuy tukukuptintaq, umallirichiqman, qayllaykuspa yachachiwasqanchikmanta pachis nisunman (Efe. 1:15, 16).