Sabadu, 18 di Abril
“Si algin fasi un pekadu, no ten un algin . . . ku ta difindi pa nos.” — 1 Jon 2:1.
Disison mas importanti ku un algin pudi toma, i dedika si vida pa Jeova i fasi parti di si familia. Jeova misti pa anos tudu no toma es disison. Pabia di ke? Pabia i misti pa e tene un amisadi ku el i vivi pa sempri. (Lei 30:19, 20; Gal 6:7, 8) Ma, Jeova ka ta obriga ningin sirbil. I ta disa pa kada kin disidi ke ki i na fasi. Ke ku ansions dibi di fasi, si un kriston batisadu fasi un pekadu gravi? Si i ka ripindi, i dibi di tiradu di kongregason. (1 Kor 5:13) Ma, mesmu asin, Jeova na bardadi misti pa algin ku fasi pekadu gravi ripindi, i pa i pasa tene mas amisadi ku el. Na bardadi, un motivu importanti ku pui Jeova da resgati, i pa i pudi purda kilis ku ripindi di se pekadus. Jeova, Deus di amor garandi, pidi pa kilis ku fasi pekadus gravi pa e ripindi. — Zak 1:3; Rom 2:4; Tiagu 4:8. w24.08 14 pars. 1-2
Dumingu, 19 di Abril
“Si bu korson sedu jiru, di mi na kontenti.” — Dit 23:15.
Na tempu ku apostolu Jon skirbi si terseru karta, i tenba kilis ku ta spalia nsinus falsu na kongregasons i tisi divisons. Ma, utrus kontinuaba “yanda na bardadi”. E ta obdisiba Jeova i e ta “yanda konformi si mandamentus.” (2 Jon 4, 6) Es kristons fiel ka kontentaba so Jon, ma tambi e kontentaba Jeova. (Dit 27:11) Ke ku no pudi aprindi? Sedu fiel ta da alegria. (1 Jon 5:3) Pur isemplu, no ta tene alegria di sibi di kuma no kontenta Jeova. I ta kontenti ora ki oja no nega fasi ke ki mau i obdisil. Anjus na seu ta kontenti tambi. (Luk 15:10) Tambi no ta kontenti ora ku no oja no ermons ku irmas kontinua sedu fiel. (2 Tes 1:4) Ora ku mundu di Satanas kabadu ku el, no na kontenti pabia no kontinua fiel pa Jeova. w24.11 12 pars. 17-18
Sugunda-fera, 20 di Abril
“Ningin ka dibi di buska si interes propi, ma i dibi di buska interes di utru.” — 1 Kor 10:24.
Kantu tempu ku bu dibi di jubi un algin, antis di falal di kuma bu sta interesadu nel? Si bu papia ku ki algin rapidu, utrus pudi pensa di kuma bu ta turmenta na toma disisons. (Dit 29:20) Pa utru ladu, si bu tarda pa papia ku el, utrus pudi pensa di kuma bu ta tarda pa toma disison, prinsipalmenti si utru algin nota di kuma bu sta interesadu nel. (Ekl 11:4) Lembra di kuma antis di papia ku un algin, bu ka pirsisa di sta konvensidu di kuma bu na kasa ku el. Ma, bu dibi di sta konvensidu di kuma, bu sta pruntu pa kasa i di kuma, ki algin pudi sedu un bon omi o bon minjer pa bo. Ma ke gora si bu nota di kuma, un algin sta interesadu na bo? Si bu ka sta interesadu nel, sforsa pa mostral klaru na bu asons. I falta di bondadi si bu fasi pa utru algin pensa di kuma bu pudi kumsa namora ku el, kontra gora i ka kila ku bu misti. — Ef 4:25. w24.05 22-23 pars. 9-10