Kasalehda Dehde Mwahu oh Ke “Pahn Pweida”

1-2. Dahkot dehde mwahu, oh ia duwen eh kak sewese kitail?

MIE pak me emen kasalehda me e sohte waunekin uhk? Mie pak me emen ahneki madamadau sapwung duwen kowe de wia mehkot me kansensuwedihiukala? De mie pak me mehkot kahrehiong uhk ken masepwehkada? Ma iei, ele ke ese ia uwen eh apwal ken mwekid ni ahl me pwung nan soangen irair pwukat. Paipel kin padahkihong kitail duwen soangen koahiek ehu me kak sewese kitail nan soangen irair pwukat oh irair tohto teikan, me iei dehde mwahu.

² Dehde mwahu iei koahiek en tehk irair ehu oh wehwehkihda dahme sohte nohn sansal. E kin kahrehiong kitail en wehwehki dahme kahrehda mehkot kin wiawi de dahme kahrehda emen kin mwekid ni ahl ehu. Oh pwehki met, kitail kak mwekid ni loalokong. Karasepe, e kak sewese kitail en ‘kaunda ewetail’ oh ese iahd me kitail en “nennenla.” (Lep. Pad. 10:19; Mel. 4:4) E kak sewese kitail en kaunda atail lingeringer oh dehr mwadang nsensuwedkihla dahme meteikan wiahiong kitail. E pil kak sewese kitail en rong ni meteikan ar kaweid kitail de kapwungkitailla. (Lep. Pad. 19:20) Eri soahng kan me kitail kin nda oh wia pahn kaperenda Siohwa, sewese meteikan, oh kamwahwihala atail mour. Oh ni atail lelohng irair apwal ehu me kin kahrehiong kitail en nsensuwedla, kitail sohte pahn mweidohng atail lingeringer en kahrehiong kitail en wia mehkot sapwung. Kitail pahn koasoiapene duwen meh silimen nan Paipel me kasalehda ia duwen dehde mwahu eh kak sewese kitail en kolokolete aktikitik, meleilei, oh likih Siohwa ni unsek.

AKTIKITIK OH DEHR AKLAPALAP

3. Ihs Nahman?

³ Pwehn mwekid ni ahl me pwung, kitail anahne soikala aklapalap. (1 Pit. 5:5) Dehde mwahu kak sewese kitail en wia met. Ia duwen? Tehk mehn kahlemeng en Nahman. E kin kousoan nan Siria, sahpw ehu me karanih Israel. Nahman wia ohl lapalap men, kaunen karis en sounpei en Siria. Ahpw, e ahnekihda soumwahu laud ehu—tokutok.—2 Nan. 5:1.

4. Ia duwen Nahman eh kasalehda me e loalokong?

⁴ En Nahman pwoudo naineki lidu serepein men sang Israel me padahkihong me mie soukohp emen nan Israel me kak kamwahwihala en eh pwoudo soumwahwo. (2 Nan. 5:​2, 3) Nahman kakete medewe, ‘Kisin serepein kis me nda me oh e kohsang sapwen at imwintihti. E kak uhdahn ndaiong ie mehkot me pahn sewese ie?’ Ahpw Nahman medemedewe dahme kisin serepeino koasoia oh sohte pohnsehsehla duwehte aramas aklapalap men. E kasalehda aktikitik oh rong dahme kisin serepeino nda. Ih eri alehdi mweimwei sang nanmwarkien Siriao en kohla Israel pwehn kamwahwihala eh soumwahwo.—2 Nan. 5:​4, 5.

5. Dahme wiawihong Nahman ni eh lella Israel?

⁵ Nahman eri lella tehnpesen Sehoram, Nanmwarki en Israel, oh e kasikasik en mwahula sang eh soumwahwo. Ahpw, Sehoram medewe me nanmwarkien Siriao songosong en akamaiong. Ni soukohp Elisa eh rongada met, e ahpw ileklahng Sehoram en kadarala Nahman reh. (2 Nan. 5:​6-9) Dahme wiawi weksang dahme Nahman kasikasik. Elisa pil sohte pedoisang nan imweo pwehn kasamwo Nahman de pil koasoiong. Ahpw e kadarala meninkeder men rehn Nahman pwehn padahkihong dahme e anahne wia pwehn mwahula.—2 Nan. 5:10.

6. (a) Dahme kahrehda Nahman sohte men rong dahme meninkedero padahkihong en wia? (b) Ia duwen nein Nahman ladu ko ar kasalehda dehde mwahu, oh ia imwilahn met? (2 Nanmwarki 5:​13, 14)

⁶ Nin tapio, Nahman sohte wia dahme meninkedero padahkihong en wia. Ahpw e “lingeringerda” oh “kohkohla.” (2 Nan. 5:​11, 12) Dahme kahrehda? Ele e pehm me e sohte alehdi wahu me e warohng nin duwen kaun lapalap en karis en sounpei en Siria. Oh e pil kakete medewe me Elisa sohte wauneki Siria. Sohte lipilipil ia kahrepeo, Nahman piladahr en dehr ale sawas ong eh soumwahwo oh pwurala imweo. Ahpw, nah ladu ko kasalehda dehde mwahu ni ar peki en pwurehng medewe eh pilipilo. Ni loalokong, Nahman eri uhdihsang eh aklapalap oh ni aktikitik idawehn en Elisa kaweido. Imwilahn met, e mwahula sang eh tokutoko!—Wadek 2 Nanmwarki 5:​13, 14.

7. Dahme kitail kak sukuhlkihsang en Nahman mehn kahlemeng? (Lepin Padahk 22:4) (Pil kilang kilel kan.)

⁷ Dahme kitail kak sukuhlkihsang en Nahman mehn kahlemeng? Kitail kin kasalehda dehde mwahu ni atail kin medemedewe mwahu mwohn atail wia mehkot. Kitail pil kin kasalehda dehde mwahu ni atail sohte kin mweidohng atail pepehm kan en kaunkitailda. Dehde mwahu kak kamwakid kitail en aktikitik. Oh aramas aktikitik men kin pohnese me e sohte ese soahng koaros. Ekei pak, kitail anahne meteikan en sewese kitail en wehwehki mwahu irair ehu. Oh Siohwa me uhdahn kak ketin sewese kitail ni ahl wet. Mendahki Nahman saikinte uhdahn ese Siohwa, e kasalehda aktikitik oh rong kisin serepein en Israelo, nah ladu kan, ahpw mehlel Elisa me wia wiliepen Siohwa. Nahman pil kak uhdihsang medemedewehte eh nsensuwed. Imwilahn met, e wiahda pilipil pwung ehu oh mwahula sang eh soumwahwo. Eri mwohn atail nda de wia mehkot, kitail anahne uhdi oh medewe. Karasepe, emen kak kihong kitail kaweid sang nan Paipel me kitail sohte pwungki. Ni met eh wiawi, kitail anahne medemedewe mwahu ma mwomwen atail pahn mwekidki kaweido pahn kasalehda me kitail aklapalap de aktikitik.—Wadek Lepin Padahk 22:4.

MELEILEI OH DEHR LINGERINGER

8. Nan soangen irair dah kan me kitail ele kin apwalki kolokolete meleilei?

⁸ Dehde mwahu kak sewese kitail en kolokolete meleilei oh dehr kin mwadang lingeringerkihda mehkot. Ei mehlel, met sohte kin ahnsou koaros mengei, ahpw mehlel ni emen eh ndaiong de wiahiong kitail mehkot ni lemei oh sohte pahrek. (Ep. 4:26) Tehk ia duwen Depit oh Apikail ara kasalehda dehde mwahu ni ara lelohng irair apwal ehu.

9. Dahme Napal wiahiong Depit?

⁹ Medewehla dahme wiawi ni Depit oh nah ohl ako arail tangatangasang Sohl oh kin kousoan nan sapwtehn en Paran. (1 Sam. 25:1) Erein arail mihmi mwo, re kin sewese pere nein ohl kepwehpwe men me adaneki Napal, nah sounsilepen sihpw kan oh pelin sihpw. (1 Sam. 25:​15, 16) Ni ahnsou me nein Napal ohl ako sesehk wunen nah sihpw ko, Depit kadarala nah meninkeder kei rehn Napal pwehn peki kanarail mwenge. Oh re wia met ni elen kadek oh wahu. (1 Sam. 25:​6-8) Ahpw Napal sohte douluhl kasalehda eh kalahnganki soahng koaros me Depit oh nah ohl ako wiadahr ong ih. E uhdahn lemei oh pil kauwehdi Depit oh nah ohl ako.—1 Sam. 25:​10, 11.

10. Ia duwen Depit oh Apikail ara kasalehda dehde mwahu? (1 Samuel 25:​32, 33) (Pil kilang kilel.)

¹⁰ Ma ke mi nan en Depit irairo, ia pahn omw pepehm? E mengei en wehwehki dahme kahrehda Depit uhdahn lingeringer. E kin ahneki pepehm kehlail kan, oh nan irair wet, e uhdahn lingeringerda me kahrehda e men kemehla Napal! (1 Sam. 25:​13, 21, 22) Ahpw Apikail, en Napal pwoud loalokongo, kauhdi Depit oh nah ohl ako ni ar kohkolahng kemehla Napal. Ia duwen Apikail eh kasalehda dehde mwahu? E wehwehki me Depit wia ohl mwahu men mendahki e lingeringer. Eri e men wia dahme e kak pwehn sewese Depit en powehdi eh lingeringero. E wadohng ih kisakis laud oh ni aktikitik kihong ih kaweid erpit. (1 Sam. 25:​18, 23-31) Depit kasalehda dehde mwahu ni eh rong dahme Apikail nda oh pohnese me eh lokaia ko kasalehda sapwellimen Siohwa madamadau ong irairo. Imwilahn met, Depit meleileidi oh soikala wiahda dihp laud ehu.—Wadek 1 Samuel 25:​32, 33.

11. Ia duwen dehde mwahu eh kak sewese kitail ni emen eh kahrehiong kitail en lingeringerda? (Lepin Padahk 19:11)

¹¹ Dahme kitail kak sukuhlkihsang mehn kahlemeng en Depit oh Apikail? En kasalehda dehde mwahu kak sewese kitail en mwekid ni meleilei nan irair ehu, mehnda ma mie kahrepen en lingeringer. E kak sewese kitail en tehk imwilahn atail koasoi oh wiewia kan. (Wadek Lepin Padahk 19:11.) Ni Apikail eh katamankihong Depit sapwellimen Siohwa madamadau, Depit kak meleileidi. Ma mehkot kahrehiong uhk ken lingeringerda, dehr mwekid ni pweipwei oh mwadang lingeringerda. (Seims 1:19) Ahpw kihong ahnsou en kapakapohng Siohwa oh medewe ia pahn sapwellimen Siohwa pepehm ong irairo, met pahn seweseiuk ken meleileidi.

12. Ia duwen meteikan ar kak sewese kitail en kasalehda dehde mwahu oh kolokolete meleilei?

¹² Duwehte Siohwa eh ketin doadoahngki Apikail pwehn sewese Depit wehwehki sapwellime madamadau ong irairo, E pil kak ketin doadoahngki meteikan pwehn sewese kitail en ahneki dehde mwahu ong irair ehu. Eri ma mehkot kahrehiong uhk ken lingeringerda, song koasoiong Kristian koahiek men me kak seweseiuk ken ahneki sapwellimen Siohwa madamadau ong irairo. (Lep. Pad. 12:15; 20:18) De ma emen kompoakepahmw lingeringerda, ke kak alasang Apikail? Ke kak sewese kompoakepahmwo en kilang sapwellimen Siohwa madamadau ong irairo? Siohwa pahn uhdahn ketin katingih omw nanti en sewese meteikan ren kasalehda dehde mwahu oh kolokolete meleilei.

LIKIH SIOHWA OH DEHR MASEPWEHK

13. Ia duwen dehde mwahu eh kak sewese kitail en powehdi atail masak?

¹³ Ekei pak, kitail pahn mihla nan irair apwal akan me pahn kahrehiong kitail en masepwehkada. Ahpw ma kitail kin medemedewe ia uwen Siohwa eh ketin manaman sang soahng koaros oh aramas koaros, met kak sewese kitail en likih ih mehnda ma kitail masepwehk. (Mel. 27:1) Siohwa pil kak ketin sewese kitail nan soangsoangen irair kan, me pil mwomwen me solahr atail koapworopwor. Ih met me wiawihong Sona. E kin uhdahn poakohng Siohwa, ahpw e masepwehkada ni Siohwa eh ketikihong ih pwukoa apwal ehu.

14. Dahme kakete kahrehiong Sona en masak wia pwukoa me Siohwa ketikihongo?

¹⁴ Siohwa ketikihong Sona pwukoa apwal ehu: en kohla Ninipe oh lohkihong towe kan rohng en kadeik ehu. (Sona 1:​1, 2) Ia pahn omw pepehm ma ke alehdi pwukoa wet? Seiloak wet uhdahn apwal pwehki Sona pahn anahne sapalki mpen sounpwong ehu sang Israel kohla Ninipe. Aramas kin esehki mehn Asiria ko aramas lemei kei. Ninipe pil adaneki “kahnimw en kakerehdi nta.” (Nah. 3:​1, 7) Sona sohte wia dahme Siohwa ketin kehkehlingkihong en wia ahpw e tangasang.—Sona 1:3.

15. Ia duwen Sona eh kalaudehla eh likih Siohwa? (Sona 2:​6-9)

¹⁵ Ni Sona eh tangatangasang Ninipe, Siohwa ketin katamankihong duwen sapwellime manaman sang ni eh ketin doarehla en Sona mour ni ahl kapwuriamwei ehu. (Sona 1:​15, 17) Sona sukuhlkihdi mehn kasukuhl ehu. Oh e wehwehkihda me e sohte anahne masepwehk en kohla Ninipe pwehki Siohwa kak ketin pere ih sang soangen keper koaros. (Wadek Sona 2:​6-9.) Ni Siohwa eh pwurehng ketikihong Sona ahnsou mwahu en kapwaiada eh pwukoau, Sona peikiong met. E kohla Ninipe oh aramas ako rong dahme e padahkihong irail oh irail pitila.—Sona 3:5.

16. Ia duwen dehde mwahu eh kak sewese kitail nan irair kamasepwehk kan? (Lepin Padahk 29:25) (Pil kilang kilel kan.)

¹⁶ Dahme kitail kak sukuhlkihsang en Sona mehn kahlemeng? Kitail sohte men mweidohng mehkot ahpw mehlel masak aramas, en kauhkitaildihsang kaudokiong Siohwa. (Wadek Lepin Padahk 29:25.) En kasalehda dehde mwahu sewese Sona en dehr medemedewehte ia uwen apwal en eh pwukoau, ahpw en tamataman me Siohwa pahn ketin sewese. Duwehte met, kitail men powehdi atail masak oh doudouloale duwen Siohwa eh ketin sewesehier oh pere kitail mahso. Kitail pil kak doudouloale mehn kahlemeng en riatail Kristian kan me powehdi irair kamasepwehk kan de pil kapwaiada pwukoa apwal kan sang ni arail kin likih Siohwa ni unsek.a (Ipru 13:6) Kitail en kasalehda dehde mwahu sang ni atail likih Siohwa ni unsek oh sewese meteikan ren pil wia met.

ALEHDI OH KOLOKOL DEHDE MWAHU

17. Dahme pahn sewese kitail en kalaudehla atail dehde mwahu?

¹⁷ Duwehte me kitail koasoiapenehr, en kasalehda dehde mwahu kak sewese kitail en mwekid ni ahl me pwung nan irair apwal kan. Dahme pahn sewese kitail en kalaudehla atail dehde mwahu? Siohwa iei me keieu kak ketin sewese kitail. Ihme kahrehda e ketikihong kitail sapwellime Mahsen oh ngehn sarawi. (Neh. 9:20; Mel. 32:8) E ketikihong kitail kaweid me kak sewese kitail en wiahda pilipil mwahu kan oh kaunda atail pepehm kan. (Mel. 119:​97-101) Eri kitail anahne medemedewe mwahu dahme Paipel kin mahsanih oh peki rehn Siohwa en ketikihong kitail sapwellime ngehn sarawi. Met pahn sewese kitail en kilangwohng soahng kan nin duwen me Siohwa kin ketin wia oh wia dahme e kupwurki kitail en wia.—Lep. Pad. 21:​11, ntp.

18. Dahme ke koasoanehdi teng en wia?

¹⁸ Kitail en pousehlahte rapahki oh kesempwalki dehde mwahu me kitail alehdi sang rehn Siohwa. (Mel. 14:2) Ma kitail wia met, kitail sohte pahn “salongasang elen dehde mwahu.” (Lep. Pad. 21:16) Oh kitail pahn koasoanehdi teng en kin kasalehda dehde mwahu ahnsou koaros oh nan soangen irair koaros. Imwilahn met, kitail “pahn pweida.”