Ndyerekezi adayesa Yesu

Yesu padabatiziwa, mzimu uchena udamutsogolera kuyenda kuchipululu. Alibe kudya chirichose kwa ntsiku 40, ndipomwapa wenze na njala maninge. Manje Ndyerekezi adabwera kudzamuyesa ndipo adamuuza kuti: ‘Peno ndimwedi Mwana wa Mulungu, uzani minyala aya kuti yasanduke mikate.’ Koma Yesu adamudawira pakufotokoza vomwe Malemba yanena, iye adanena kuti: ‘Malemba yanena kuti munthu angakhalelini na moyo na chakudya chokha, Koma na mawu yaliyose yochokera nkamwa mwa Yahova.’

Patsogolo pake, Ndyerekezi adauza Yesu kuti: ‘Peno ndimwedi Mwana wa Mulungu, mudzithuse kuchokera padzulu pa kachisi. Pale Malemba yanena kuti Mulungu adzatume angelo wake kuti akuyakheni kuti muleke kupwetekeka.’ Koma Yesu adamudawira pomwe pakuphatisa basa Malemba. Iye adanena kuti: ‘Malemba yanena kuti ayi kumuyesa Yahova.’

Patsogolo pake, Ndyerekezi adawonesa Yesu maufumu yose ya padziko yapasi na chuma chawo, ndipo adamuuza kuti: ‘Nikupaseni maufumu yose mwaya na chuma chose mwichi peno munganigwadireko kabodzi kokha.’ Koma Yesu adamudawira kuti: ‘Choka Satana! Ndawa Malemba yanena kuti ufunika kutumikira Yahova yekha basi.’

Yesu padanena vimwevi, Ndyerekezi adamusiya ndipo angelo adabwera kudzamupasa chakudya kuti adye. Vimwevi pavidapita, Yesu adayamba kulalikira ntontholo wabwino wa Ufumu. Mwiyi ni basa yomwe Mulungu adamutuma padziko yapasi kuti adzachite. Wanthu ambakonda vomwe Yesu ambapfunzisa ndipo ambamulondola kulikose komwe ambayenda.