Adakalipa mpakana kupha m’bale wake

Adamu na Hava padathamangisiwa m’munda wa Edeni, adakhala na wana azinji. Mwana wawo woyamba wenze Kaini ndipo wachiwiri wenze Abele. Kaini wenze mulimi, koma Abele wenze nyakabusa.

Ntsiku inango, Kaini na Abele adapereka ntsembe kwa Yahova. Ko unkudziwa kuti ntsembe ni chani? Ni mphaso yapadera. Yahova adakondwa na ntsembe ya Abele, koma alibe kukondwa na ntsembe ya Kaini ndipo Kaini adakalipa maninge. Yahova adamuuza kuti afunikalini kukalipa maninge ndawa yakuti angachite chinthu choipa koma Kaini alibe kubvera.

Manje, Kaini adauza Abele kuti: ‘Nabo kumunda.’ Ali kumunda muko, adayamba kumumenya m’bale wake mpakana kumupha. Ko Yahova adachita tani? Adamulanga Kaini pakumuthamangisira kutali ndipo alibe kukwanisa pomwe kubwerera kwawo.

Ko tinkupfunzira chani pa nkhani mweyi? Nthawe zinango tingakwinyilire vikakhala kuti vinthu viribe kufamba momwe isepano tinkufunira. Koma tikaona kuti tayamba kukalipa maninge, panango anango akatipasa malangizo, tifunikalini kupitiriza kukhala na ukali kugopera kuti tingayambe kuchita vinthu voipa.

Pakuti Abele ambakonda maninge Yahova komasoti ambachita vinthu vabwino, Yahova adzamuyebwelini adzamumukise kuti adzakhale pomwe na moyo mu paradaiso.