Yahova adayankhula na Samueli

Eli wenze wantsembe ndipo wenze na wana awiri omwe ambatumikira ninge wantsembe kukachisi. Madzina yawo enze Hofeni na Pinihasi. Wana mwawa ambabveralini malamulo ya Yahova ndipo ambachitira wanthu vinthu voipa. Aizirayeli akapereka ntsembe kwa Yahova iwo ambatenga nyama zabwino nkumbadya. Eli adabva vomwe wana wake mwawa ambachita, koma ambawathandizalini. Ko Yahova adandoilekerera tene nkhani mweyi?

Podiya kuti Samueli wenze ng’ono pakulinganiza na Hofeni na Pinihasi, iye alibe kutengera makhalidwe yawo yoipa. Ndipo Yahova ambakondwa naye maninge. Ntsiku inango pomwe wenze gone, adabva munthu ankumuchemera, iye adamuka nkuyenda kwa Eli. Ndipo padafika adalewa kuti: ‘Nabwera.’ Koma Eli adalewa kuti: ‘Niribe kukuchemera ine yenda kagone.’ Samueli padayenda kukagona adabva pomwe kuchemera kachiwiri. Kachitatu Eli adazindikira kuti yemwe ambamuchemera ni Yahova, pamwapo adamuuza kuti akakakuchemera pomwe ukadawire kuti: ‘Yankhulani Yahova ine ntumiki wanu ninkubvesera.’

Samueli padayenda kukagona, adabva pomwe kuchemera kuti: ‘Samueli! Samueli!’ ndipo iye adadawira kuti: ‘Yankhulani, ine ntumiki wanu ninkubvesera.’ Manje Yahova adamuuza kuti: ‘Ukamuuze Eli kuti nimulange iye na banja yake, ankudziwa voipa vomwe wana wake ankuchita pakachisi koma ankuwalekerera.’ Pakudachena Samueli adayenda kukafungula misuwo ya kachisi ninge momwe ambachitira nthawe zose. Iye ambagopa kuuza nkulu wa antsembe vomwe Yahova adalewa. Koma Eli adamuchemera nkumubvunza kuti: ‘Mwana wangu, ko Yahova wakuuza chani? Niuze chirichose.’ Patsogolo pake Samueli adauza Eli vose vomwe Yahova adalewa.

Yahova adapitiriza kutsogolera Samueli. Wanthu wose wa mu dziko ya Izirayeli ambadziwa kuti Yahova wasankhula Samueli kuti akhale mneneri komasoti oweruza.