NKHANI YOPFUNZIRA 15
NYIMBO NA. 30 Atate Wanga, Mulungu Wanga Ndiponso Bwenzi Langa
Kukhala pa ushamwali wolimba na Mulungu ni chinthu chabwino kwa isepano
‘Kwa inepano kufederera Mulungu ni chinthu chabwino.’—SAL. 73:28.
CHOLINGA
Kuona momwe tingakhalire pa ushamwali wolimba na Yahova na kuona momwe vimwevi viliri vodekana kwa isepano.
1-2. (a) Ko chodekana ni chani kuti tikhale pa ushamwali wolimba na munzathu? (b) Ko tipfunzire chani mu nkhani mweyi?
GANIZIRANI va shamwali wanu yemwe mumukonda maninge. Ko ushamwali wanu udayamba tani? Panango vingachitike kuti imwepo mumbamala nthawe itali muli pabodzi, mudadziwa va mabvuto yomwe iye adagumana nayo ndipo mudazindikira vinthu vomwe iye akonda na vomwe akondalini. Mudaona kuti shamwali wanu anamakhalidwe yanango yomwe muchita nayo chidwi ndipo munkufuna kuyatewenza. Ndipo kuyenda kwa nthawe mudayamba kumukonda maninge.
2 Kukhala pa ushamwali wolimba na munthu kudekana nthawe komasoti khama. Tinganene pomwe kuti nchibodzibodzi na ushamwali wathu na Yahova. Mu pfunziro mweino tione kuti tingachite tani kuti tipitirize kukhala pa ushamwali wolimba na Yahova, ndipo ndawa chani tidekana kuchita vimwevi. Koma chakuyamba tione kuti ndawa chani ni vabwino kumufenderera shamwali wathu Yahova.
3. Ko ndawa chani tichadekana kuganizira kudekana kwa kufederera Yahova?
3 Mosakaika, imwepo mutsimikiza kuti kukhala pa ushamwali na Yahova ni chinthu chabwino maninge. Koma kuganizira ubwino wochita vimwevi kudzatilimbikise kuti tipitirize kumufenderera. (Sal. 63:6-8) Mwakulinganiza, tose isepano tidziwa kuti, kuti tikhale na thanzi yabwino tichadekana kudya vakudya vopasa thanzi, kuchita masenzeka yolimbisa thupi, kugona mokwana komasoti kumwa madzi yokwana. Koma kundoti wanthu azinji aviyikhiralini nzeru vimwevi ndipo asiya kuchita vinthu vomwe vingawathandize kuti akhale na thanzi yabwino. Koma chaivo nivakuti tikambaganizira ubwino wokhala na thanzi yabwino, vitichitisa kuti timbachite khama kuchita vinthu vomwe vingatithandize kuti tikhale na thanzi yabwino. Nchibodzibodzimbo, tidziwa kuti kukhala pa ushamwali na Yahova ni chinthu chabwino kwa isepano, koma kudziwa ubwino wa ushamwali moyu vingachitise kuti timufenderere maninge Yahova.—Sal. 119:27-30.
4. Ko wamasalimo adanena chani pa Salimo 73:28?
4 Werengani Salimo 73:28. Wonemba Salimo 73, wenze m’bodzi mwa Alevi omwe adasaluliwa kuti ambayimbe pa kachisi wa Yahova. Vingachitike kuti iye ambatumikira Yahova kwa magole yazinji. Olo viri teno, iye adaona pomwe kuti nivabwino kukumbukira na kukumbusa pomwe anango ubwino ‘wofenderera Mulungu.’ Ko ni maphindu yanango yaponi yomwe yangabwere ndawa ya vimwevi?
KUKHALA AZISHAMWALI WA YAHOVA KUBWERESA CHIMWEMWE
5. (a) Ko ndawa chani tinganene kuti kukhala azishamwali wa Yahova kutibweresera chimwemwe? (b) Perekani chitsanzo chokhudza imwepo chomwe chionesa kuti nzeru za Yahova zikuthandizani komasoti zikutetezani. (Miyambo 2:6-16)
5 Pomwe tinkulimbisa maninge ushamwali wathu na Yahova ni pomwe tikhala okondwa maninge. (Sal. 65:4) Tinganene vimwevi ndawa ya vifukwa vizinji. Mwakulinganiza, tikambawerenga m’Baibolo vomwe Yahova anena na kumbaviphatisa basa, tikhala ozindikira. Kuzindikira moku kutiteteza ku vinthu voipa vomwe vingatichitise kuchita machimo yakulu yakulu. (Werengani Miyambo 2:6-16.) Ndipomwapa, Baibolo inena kuti: ‘Wokondwa ni munthu yemwe agumana nzeru komasoti munthu yemwe apfunzira vinthu vomwe vingamuthandize kukhala wozindikira.’—Miy. 3:13.
6. Ko nchani chidachitisa kuti wamasalimo aluze chimwemwe chake?
6 Ni shuwadi kuti azishamwali wa Yahova angakhale okwinyirira nthawe zinango. Wonemba Salimo 73, adaluza chimwemwe chake ndawa yoganizira maninge vinthu vosalimbikisa. Iye adakwinyirira komasoti kuchitira njiru wanthu woipa, ndawa yakuti mumaganizo mwake wanthu omwe ambatumikiralini Mulungu na kusaikhira nzeru malamulo yake ambaoneka ninge ana moyo wabwino. Wamasalimo moyu adafika mpakana kuganiza kuti wanthu omwe achitira nkhanza anzawo na odzikonda, enze wolemera maninge komasoti enze na thanzi yabwino ndipo ambaboneralini. (Sal. 73:3-7, 12) Iye adakhumudwa maninge ndipo adafika pa kumbakaikira kuti peno khama yake yomwe ambachita pa kutumikira Yahova ina phindu. Tingakwanise kubva momwe iye wenzere wokhumudwa tikambawerenga vomwe iye adanemba. Iye adanemba kuti: ‘Shuwadi nachenesa ntima wangu papezi ndipo nasamba m’manja mwangu papezi pakuonesa kuti ndine wosaphonya.’—Sal. 73:13.
7. Ko tikakhala okwinyirira tingadekane kuchita chani? (Onani pomwe foto .)
7 Olo kuti wenze wokhumudwa maninge, wamasalimo moyu adachita vinthu vakuti vimuthandize kuchinja kaganizidwe kake. Iye ‘adangena m’malo yopatulika ya ulemerero wa Mulungu,’ ndipo mumo Yahova adamuchitisa kuti achinje kaganizidwe kake. (Sal. 73:17-19) Ntsiku zino, Yahova yemwe ni shamwali wathu wa pa ntima adziwa tikakhala kuti ndise okwinyirira. Tikakumbira malangizo yake na kubvuma thandizo yake yomwe angatipase kuchokera m’Mawu yake na mumpingo, tidzakhale na mphanvu zolimbana na maganizo yokhumudwa. Tikakhala okwinyirira maninge mpakana kusadziwa vomwe tingachite, Yahova adzatilimbikise komasoti kutinyamalisa.—Sal. 94:19.a
Mu Levi yemwe adanemba Salimo 73, ali pa ‘malo yopatulika ya Mulungu’ (Onani ndime 7)
“KUKHALA AZISHAMWALI WA YAHOVA KUTICHITISA KUKHALA NA CHOLINGA PA MOYO KOMASOTI CHIDIKHIRO
8. Fotokozani pomwe madaliso yawiri yomwe yabwera ndawa yokhala azishamwali wa Mulungu?
8 Kukhala azishamwali wa Yahova, ni kwabwino kwa isepano ndawa ya vifukwa vinango viwiri. Chakuyamba, vimwevi vitichitisa kuti tikhale na cholinga chaicho pa moyo. Chachiwiri, vitipasa chidikhiro chothembeka cha kutsogolo. (Yer. 29:11) Naboni tikambirane va maphindu yawiri mwaya.
9. Ko ndawa chani kukhala azishamwali wa Yahova kutipasa cholinga pa moyo?
9 Wanthu azinji ntsiku zino anena kuti kulibe Mulungu. Ndawa ya vimwevi, iwo anena kuti moyo ulibe cholinga ndipo kuyenda kwa nthawe wanthu ose adzamale pa dziko yapasi. Koma kukhala azishamwali wa Yahova kutipasa cholinga pa moyo. Kupfunzira Baibolo kutilimbikisa kuti Yahova aliko “ndipo apereka malipiro kwa wanthu omwe amufagafaga na ntima wose.” (Aheb. 11:6) Kuyingizira pamwapa, Yahova adatilenga na maganizo yofuna kumutumikira. Tikachita vimwevi tikhala okondwa maninge.—Deut. 10:12, 13.
10. Mobverana na Salimo 37:29, ko Yahova wawapolomisa chani wanthu omwe amuthemba?
10 Ntsiku zino, wanthu azinji alibe chidikhiro chaicho cha kutsogolo. Ndipo aganiza kuti chodekana pa moyo ni kuphata basa, kulowola, kubereka wana na kuyesesa kusunga kobiri kuti zidzawathandize akadzakalamba. Iwo ayikhakolini Mulungu pa moyo wawo. Koma atumiki wa Yahova ayikha chidikhiro chawo kwa iye. (Sal. 25:3-5; 1 Tim. 6:17) Isepano tithemba Mulungu yemwe ni shamwali wathu, ndipo tina chitsimikizo chakuti adzakwanirise vose vomwe adapolomisa. Tinkudikhira vinthu vizinji vabwino maninge va kutsogolo, makamaka kudzatumikira Yahova m’Paradaiso mpakana kalekale.—Werengani Salimo 37:29.
11. Ko ni madaliso yanango yaponi yomwe yabwera ndawa yokhala azishamwali wa Yahova?
11 Kukhala pa ushamwali na Mulungu kutipasa madaliso yazinji. Mwakulinganiza, tikachita chimo nkulapa, Yahova atikhululukira. (Yes. 1:18) Ndipo tingakwanise kupitiriza kumutumikira tina chikumbuntima chochena, neye kudziyimba mulandu na vinthu vomwe tidaphonyesa. (Sal. 32:1-5) Kuyingizira pamwapa, tina mwayi ukulu wochitisa Yahova kukhala wokondwa. (Miy. 23:15) Nishuwadi kuti mukukwanisa kukumbukira maphindu yazinji maninge yomwe tingagumane ndawa yokhala azishamwali wa Yahova. Manje ko tingachite chani kuti tipitirize kumufenderera Yahova?
PITIRIZANI ‘KUMUFENDERERA YAHOVA’
12. Ko imwepo mudachita kale chani kuti mukhale shamwali wa Mulungu?
12 Peno ndimwe wobatizika, imwepo mudachita vinthu vizinji maninge kuti mukhale azishamwali wa Mulungu. Mudapfunzira vinthu vizinji vokhudza Yahova komasoti Yesu, mudalapa machimo yanu, mudaonesa kuti muna chikhulupiriro kwa Mulungu ndipo mudachita khama kuti mumbachite chifuniro chake. Koma kuti tikhale pa ushamwali wolimba maninge na Mulungu tichadekana kupitiriza kuchita vimwevi.—Akol. 2:6.
13. Fotokozani vinthu vitatu vomwe vingatithandize kuti tipitirize kufenderera Yahova.
13 Ko nchani chidzatithandize kupitiriza kufenderera Yahova? (1) Tichadekana kupitiriza kuwerenga na kupfunzira Baibolo. Koma cholinga chathu chidekanalini kundopfunzira vinthu voyambirira vokhudza Mulungu. Tichadeka kuyesesa kubvesa momwe Yahova aganizira, vomwe iye ankufuna kuti tichite nkuchita vimwevo pa moyo wathu. (Aef. 5:15-17) (2) Tichadekana kulimbisa chikhulupiriro chathu pakumbaganizira njira zizinji zomwe Yahova awonesera chikondi chake kwa isepano. (3) Tichadekana kupitiriza kuzonda vinthu vomwe vikhumudwisa Yahova na kuleka kukhala pa ushamwali na wanthu omwe achita vinthu vimwevi.—Sal. 1:1; 101:3.
14. Ko ni vinthu viponi vomwe tingachite ntsiku iriyose kuti tikondwerese Yahova? (1 Akorinto 10:31) (Onani pomwe mafoto.)
14 Werengani 1 Akorinto 10:31. Nivabwino kuchita khama kuchita vinthu vomwe vikondweresa Yahova. Vimwevi ni kulalikiralini kokha na kufika pa misonkhano, viphatanidza pomwe vomwe tichita ntsiku na ntsiku. Mwakulinganiza, tikakhala owona ntima pa vinthu vose, nkumbathandiza anzathu na vinthu vomwe tinavo, Yahova akhala wokondwa. (2 Akor. 8:21; 9:7) Iye afuna pomwe kuti timbalemekeze mphaso ya moyo. Tifenderera Iye yemwe adatipasa moyo tikambadya na kumwa mwa chikatikati na kusamalira pomwe thanzi yathu mwa njira zinango. Khama iriyose yomwe tingachite kuti tikondwerese Yahova, olo pa vinthu ving’onoving’ono viyingizira chikondi chake kwa isepano.—Luka 16:10.
Njira zinango zomwe tingamukondweresere Yahova ni izi: Kufambisa mwachitetezo, kuchita masenzeka yolimbisa thupi, kudya vakudya vopasa thanzi na kukhala opasa (Onani ndime 14)
15. Ko tichadekana kuwaona tani anango?
15 Yahova ni wachifundo kwa olungama na kwa osalungama. (Mat. 5:45) Iye adikhirambo kuti timbachitembo vibodzibodzi. Mwakulinganiza, isepano ‘tineneralini vinthu voipa munthu aliyese, tigegedzanalini na wanthu, . . . koma tionesa kupfatsa kwa wanthu ose.’ (Tito 3:2) Ndipomwapa, olo kuti munthu munango akhulupiriralini Yahova, isepano tidzionalini kuti ndise odekana maninge kuposha iye. (2 Tim. 2:23-25) Tikakhala okoma ntima nkumbachitira vinthu vabwino anango, timufenderera maninge Mulungu.
LIMBISANI USHAMWALI WANU NA MULUNGU, OLO POMWE MWAPHONYESA VINTHU
16. Ko wonemba Salimo 73, adayamba kudzibva tani ndawa ya vophonya vake?
16 Nthawe zinango, ndawa ya vinthu vomwe taphonyesa tingayambe kumbakumbukira kuti Yahova ni shamwali wathulini pomwe. Wonemba Salimo 73, adayamba kubvambo tene uyu, mpakana iye adadandaula kuti: ‘Mapazi yangu yenze yadandokhala pang’ono kusokera. Yenze yadandokhala pang’ono kuterereka.’ (Sal. 73:2) Iye adabvuma kuti ‘ambawawiwa mu ntima’ komasoti kuti wenze adachita ‘vinthu viribe nzeru’ ‘ninge nyama yosaganiza.’ (Sal. 73:21, 22) Panango iye ambakumbuka kuti ndawa ya vophonya vake wenze munthu wakuti angakhululukiriwelini ndipo angadekanelini chikondi cha Yahova.
17. (a) Pa nthawe yoshupa ya moyo wake, ko wamasalimo adachita chani? (b) Ko chitsanzo chake chinkutipfunzisa chani? (Onani pomwe mafoto.)
17 Peno wamasalimo moyu ambaganiza kuti ushamwali wake na Yahova wamala, maganizo mwaya yadamala. Vinkuoneka ninge pa nthawe yoshupa mweyi, iye adadziwa kudekana kwa kufederera Mulungu. Mpakana iye adamuwuza Yahova kuti: ‘Koma manje ni na imwepo [Yahova]; nthawe zose, mwaphata djanja yangu ya makulu, munitsogolera na malangizo yanu ndipo patsogolo pake mudzanipase ulemerero.’ (Sal. 73:23, 24) Tikakhala ofoka panango okhumudwa, tidekanambo kufaga thandizo ya Yahova. Iye ni Dwale yathu yomwe itilimbikisa. (Sal. 73:26; 94:18) Olo kuti tidamusiya Yahova kwa kanthawe, tingakhale pomwe naye pa ushamwali ndawa kuti iye ni ‘wokonzeka nthawe zose kutikhululukira.’ (Sal. 86:5) Ni pa nthawe zoshupa maninge pomwe tidekana kumufenderera maninge Yahova.—Sal. 103:13, 14.
Tikakhala ofoka mwauzimu, tichadekana kumufenderera Yahova pakuchita vizinji pa basa zauzimu (Onani ndime 17)
LIMBISANI USHAMWALI WANU NA YAHOVA MPAKANA KALEKALE
18. Ko ndawa chani tichadekana kupitiriza kulimbisa ushamwali wathu na Yahova mpakana kalekale?
18 Isepano tingapitirize kulimbisa ushamwali wathu na Yahova mpakana kalekale. Tinkudziwa vimwevi ndawa yakuti Baibolo inena kuti: “Nzeru zake ni zapadzulu, komasoti iye ni wodziwa vinthu maninge.” (Aro. 11:33) Ndipomwapa, isepano tidzasiyelini kupfunzira va Yahova.
19. Ko ni chitsimikizo chiponi chomwe lemba ya Salimo 73 itipasa?
19 Salimo 79:13 inena kuti: ‘Ise wanthu wanu komasoti nkhosa zomwe munkubusa, tidzakutembejeni mpakana kalekale. Ndipo tidzalengeze kuti ndimwe woyenera kutumikiriwa ku mibadwomibadwo.’ Imwepombo mungatsimikizire kuti ni vokwanisika kulimbisa ushamwali wanu na Mulungu, na kuti iye angakudaliseni mpakana kalekale. Ninge wamasalimo, imwepo munganenembo kuti: ‘Mulungu ni dwale ya ntima wangu, komasoti cholowa changu mpakana kalekale.’—Sal. 73:26.
NYIMBO NA. 32 Khalani Kumbali ya Yehova
a Wale omwe ni okwinyirira, wa nkhawa komasoti okhumudwa kwa nthawe itali, panango angadekana kufaga thandizo ya kushipitali. Kuti mudziwe vizinji va nkhani mweyi, onani mu Ntsanja ya Ulonda ya Na. 1 2023.