NKHANI YOPFUNZIRA 49
Tingakhale na moyo mpaka kalekale
‘Moyo wosapera adzaugumane.’—YOH. 17:3.
NYIMBO NA. 147 Mulungu Watilonjeza Moyo Wosatha
VOMWE TIPFUNZIREa
1. Ko tingaphindule tani tikambaganizira moyo wosapera womwe Yahova watipolomisa?
YAHOVA wapolomisa kuti adzapereke ‘moyo wosapera’ kwa wanthu omubvera. (Aro. 6:23) Tikambaganizira vomwe Yahova watipolomisa, tiyamba kumukonda maninge. Ndoganizani so! Ababa wathu wakudzulu atikonda maninge ndipo palibe chomwe chingatisiyanise na iwo.
2. Ko polomisi ya moyo wosapera itithandiza tani?
2 Kudziwa kuti Mulungu adzatipase moyo wosapera kutithandiza kupirira mabvuto yathu. Podiya wanthu afune kutipha, tilekalini kukhala okhulupirika kwa Yahova. Ndawa chani? Ni ndawa yakuti tidziwa bwino kuti tikafa tili okhulupirika kwa Yahova, adzatimukise nkutipasa moyo wosapera. (Yoh. 5:28, 29; 1 Akor. 15:55-58; Aheb. 2:15) Ndawa chani tinkulewa motsimikiza kuti tidzakhaledi na moyo wosapera? Naboni tikambirane vifukwa vake.
YAHOVA ADZAKHALEKO MPAKA KALEKALE
3. Ndawa chani ndise otsimikiza kuti Yahova adzatipasedi moyo wosapera? (Salimo 102:12, 24, 27)
3 Tinkutsimikiza kuti Yahova adzatipasedi moyo wosapera ndawa yakuti iye ndiye Wopereka moyo ndipo adzakhaleko mpaka kalekale. (Sal. 36:9) Onankoni mavesi yomwe yankutsimikizira kuti Yahova wakhalako kundochokera kalekale ndipo adzakhaleko mpaka kalekale. Lemba ya Salimo 90:2 ilewa kuti Yahova aliko ‘kuchokera kalekale mpakana kalekale.’ Ndipo bukhu ya Salimo 102 ifotokozambo vibodzibodzi. (Lewengani Salimo 102:12, 24, 27.) Ndipo pakulewa va Ababa wathu wakudzulu, Habakuku adanemba kuti: ‘Imwe Yahova, imwepo mwakhalapo kuyambira kalekale. Imwepo Mulungu wangu ndimwe Wochena ndipo mungafelini.’—Hab. 1:12.
4. Ko peno tinkutsimikizalini kuti Yahova wakhalako kuchokera kalekale, ndiye kuti iye kulibe? Fotokozani.
4 Ko vikushupani kutsimikizira kuti Yahova wakhalako ‘kuchokera kalekale’? (Yes. 40:28) Peno nteno, dziwani kuti ndimwelini mwekha. Pakulewa va Mulungu, Elihu adati: ‘Palibe angakwanise kuwerenga magole yake.’ (Yobu 36:26) Tikambakangira kubvesesa chinthu, vitanthauzalini kuti icho kulibe. Mwakulinganiza, wanthu azinji abvesalini bwinobwino kuti kuvunika kufikira tani dziko yose yapasi. Manje pamwapa tingalewe kuti kulibe vinthu vomwe vichitisa kugwerewera? Neye. Nchibodzibodzimbo, tingalewelini kuti Yahova kulibe so ndawa yakuti tinkubvesalini kuti iye wakhalako kuchokera kalekale. (Aro. 11:33-36) Vinthu vose vikanati kukhalako, ninge dzuwa na nyenyezi, iye wenzeko kale. Tinkutsimikiziriwa kuti Yahova ndiye ‘adakhazikisa dziko yapasi na mphanvu zake.’ Inde, ‘kudzulu kukanati kukonzewa,’ iye wenzeko kale. (Yer. 51:15; Mac. 17:24) Ko ni chifukwa chinango chiponi chomwe chinkutitsimikizira kuti tidzakhaledi na moyo wosapera?
TIDALENGEWA KUTI TIKHALE NA MOYO MPAKA KALEKALE
5. Ko banja yoyambirira yenze na mwayi uponi?
5 Yahova adakonza vinthu vamoyo vizinji kuti osati vikhaleko mpaka kalekale. Koma wanthu adawakonza kuti ambakhale na moyo mpakana kalekale. Iwo wokha ndiwo adapasiwa mwayi wakuti osati ambafe. Koma olo nteno, Yahova adachenjeza Adamu kuti: ‘Ayi kudzadya chipaso chodziwisa chabwino na choipa, ndawa ntsiku yati udzadye shuwa udzafe.’ (Gen. 2:17) Adakati Adamu na Hava adabvera Yahova, sembe alibe kufa. Yahova adakafuna, adakawauza kuti ayende pomwe kukadya vipaso va ‘mmuti wa moyo.’ Ndipo adakati adawabvumizadi, sembe iwo ‘adakhala na moyo mpaka kalekale.’b—Gen. 3:22.
6-7. (a) Ko nchani pomwe chinkutsimikizira kuti wanthu alibe kulengewa kuti ambafe? (b) Ko imwepo munashungu yodzakhala na moyo wotani? (Onani mafoto.)
6 Wanthu wopfunzira maninge adazindikira kuti ulupi wathu usunga vinthu vizinji vakuti tiferamo osakwanisa kuviphatisa basa ndawa ya kufupika kwa moyo. Vimwevi ni vochitisa chidwi maninge. Mu 2010, jornal ya Mente Americana Científica idati ulupi wathu unamalo yosunga vinthu yothamingira madjiga 2000000 na hafu. Vichiikhiwa mu vidiyo kuti tivinyang’anire mosaimaima, tingamale magole yoposha 300 kuti tivimalize. Koma ulupi wathu ungakwanise kusunga vinthu voposha pamwapa. Vimwevi vinkuwonesa kuti Yahova adakonza ulupi wathu kuti umbasunge vinthu osati vakundophatisa basa magole 70 panango 80 basi.—Sal. 90:10.
7 Yahova adatikonza pomwe na shungu ikulu yofuna kukhala na moyo mpakana kalekale. Baibolo ilewa kuti Mulungu adapasa wanthu ‘mtima wofuna kukhala na moyo mpaka kalekale.’ (Mla. 3:11) Ndipomwapa tiwona kuti impfa ni mdani wathu. (1 Akor. 15:26) Ko tikadwala maninge, tindodzilekererambo kuti tindofa? Neye. Tiyenderatu kushipitali kuti tikapasiwe mankhwala kuti tipole. Tichita vose vatingakwanise kuti osati tife. Ndipo tikaferewa munthu wapamoyo peno akhale mulumbwana panango wokalamba, vitiwawa maninge. (Yoh. 11:32, 33) Tingakwanise kukhala na moyo wosapera nkumbapfunzira vinthu mpakana kalekale ndawa yakuti Yahova adatilenga tene. Ndipomwapa timbatsimikize kuti adzatipasedi moyo wosapera. Koma pali pomwe vifukwa vinango votitsimikizira kuti tidzakhaledi na moyo wosapera. Naboni tikambirane vinthu vomwe Yahova adachita kalekale na vomwe ankuchita manjeuno vomwe vinkutsimikizira kuti alibe kuchinja cholinga chake choyambirira.
Podziwa kuti tidzakhale na moyo wosapera, tikondwa kuganizira vomwe tidzachite kutsogolo (Onani ndime 7)c
YAHOVA ALIBE KUCHINJA CHOLINGA CHAKE
8. Ko lemba ya Yesaya 55:11 inkutsimikizira chani pankhani ya cholinga cha Yahova?
8 Podiya kuti Adamu na Hava adachimwa nkubweresa impfa kwa wana wawo, Yahova alibe kuchinja cholinga chake. (Lewengani Yesaya 55:11.) Iye adakali kufuna kudzapasa moyo wosapera wanthu okhulupirika. Tinkulewa motsimikiza tene ndawa ya vinthu vomwe iye adayankhula na kuchita kuti akwanirise cholinga chake.
9. Nchani chomwe Mulungu adapolomisa? (Danieli 12:2, 13)
9 Yahova adapolomisa kuti adzamukise wakufa nkuwapasa moyo wosapera. (Mac. 24:15; Tito 1:1, 2) Munthu wokhulupirika Yobu wenze wotsimikiza kuti Yahova anashungu yomukisa wanthu omwe adafa. (Yobu 14:14, 15) Mneneri Danieli wenzembo wotsimikiza kuti wanthu adzamukisiwe nkukhala na moyo wosapera. (Sal. 37:29; lewengani Danieli 12:2, 13.) Ayuda wa munthawe ya Yesu ambadziwambo kuti Yahova adzamukise atumiki wake okhulupirika nkuwapasa ‘moyo wosapera.’ (Luka 10:25; 18:18) Yesu adabwerezerabwerezera nkhani mwiyi ndipo iyembo adamukisiwa na Ababa wake.—Mat. 19:29; 22:31, 32; Luka 18:30; Yoh. 11:25.
Mukaganizira momwe Eliya adamukisira kamwana aka, ko ndimwe wotsimikiza kuti kutsogolo kudzachitike chani?(Onani ndime 10)
10. Ko nkhani za wanthu omwe adamukisiwa kalekale zinkutitsimikizira chani? (Onani foto.)
10 Yahova ndiye Wopereka moyo ndipo iye anayo mphanvu yomukisa wanthu wakufa. Iye adapasa mphanvu mneneri Eliya kuti amukise mwana wa nkazi wamasiye wa ku Zarefati. (1 Maf. 17:21-23) Patsogolo pake mneneri Elisa adamukisambo mwana wa nkazi wa ku Sunemu mothandiziwa na Mulungu. (2 Maf. 4:18-20, 34-37) Kumukisiwa kwa wanthu mwawa na anango, kunkutsimikizira kuti Yahova anayodi mphanvu yomukisa wakufa. Pewenze padziko yapasi, Yesu adapasiwambo mphanvu yomukisa wakufa. (Yoh. 11:23-25, 43, 44) Manjeuno Yesu ali kudzulu ndipo adapasiwa ‘ulamuliro . . . wotonga kudzulu na dziko yapasi.’ Iye ni wokonzeka ‘kumukisa wose omwe ali m’manda yachikumbuso’ nkuwapasa moyo wosapera.—Mat. 28:18; Yoh. 5:25-29.
11. Ko ntsembe ya dipo inkuchitisa tani kuti vikhale vokwanisika kudzagumana moyo wosapera?
11 Ndawa chani Yahova adabvuma kuti Mwana wake wapamoyo afe impfa yowawa maninge? Pakufotokoza ndawa yake, Yesu adati: ‘Mulungu adakonda maninge dziko, mwakuti adapereka Mwana wake wobadwa yekha kuti wose omwe angamukhulupirire osati adzachenekewe, koma adzagumane moyo wosapera.’ (Yoh. 3:16) Pakuti Mulungu adapereka Mwana wake kuti atiwombole ku machimo, ni vokwanisika kuti tidzagumane moyo wosapera. (Mat. 20:28) Mtumi Paulo adabvekesa bwino cholinga cha Mulungu mwichi pakunemba kuti: ‘Pakuti impfa idabwera ndawa ya munthu m’bodzi, kumukisiwa kwa wakufa kudafikambo ndawa ya munthu m’bodzi. Pakuti wanthu wose ankufa ndawa ya Adamu, Khrisitu adzachitisembo kuti wose adzapasiwe moyo.’—1 Akor. 15:21, 22.
12. Ko Ufumu udzakwanirise tani chifuniro chomwe Yahova anacho kwa isepano?
12 Yesu adapfunzisa wopfunzira wake kuti ambapemphere kuti Ufumu wa Mulungu ubwere kuti udzakwanirise chifuniro cha Mulungu padziko yapasi. (Mat. 6:9, 10) Chifuniro chake nchakuti wanthu adzakhale na moyo wosapera padziko yapasi. Kuti vimwivi vichitike, Yahova adasankhula Mwana wake kuti akhale Mpfumu ya Ufumu wake. Ndipo Mulungu wakhala ankutenga wa 144000 padziko pano kuti akathandizane na Yesu pokwanirisa chifuniro cha Mulungu.—Chiv. 5:9, 10.
13. Ko Yahova ankuchita chani manjeuno, ndipo imwepo munkuthandizira tani?
13 Manjeuno Yahova ankuunganidza pomwe wa ‘gulu ikulu’ achimbawapfunzisa kuti akhale nzika za Ufumu wake. (Chiv. 7:9, 10; Yak. 2:8) Podiya kuti wa ‘gulu ikulu’ ankukhala mudziko yogawikana ndawa ya ndale, nkhondo na kusankhulana khaindi, iwo ankuyesesa kuti ambakhale mwantendere. Vili ninge kuti iwo ankuphula vitsulo vawo va nkhondo kuti vikhale vogwatira miti. (Mika 4:3) M’malo mwakuti ambamenyembo nkhondo yomwe ichitisa kuti wanthu azinji afe, iwo ankupfunzisa wanthu kuti adziwe Mulungu chaiye na chifuniro chake kuti adzagumane ‘moyo chaiwo.’ (1 Tim. 6:19) Iwo angambatsutsiwe na wanthu wa m’banja mwawo panango kukhala na kobiri zochepa ndawa yakuti ankuthandizira Ufumu wa Mulungu. Koma Yahova awapasa vosowa vawo. (Mat. 6:25, 30-33; Luka 18:29, 30) Vimwevi vinkutitsimikizira kuti Ufumu wa Mulungu ni chaiwo ndipo udzapitirize kukwanirisa chifuniro cha Yahova.
TINKUDIKHIRA VINTHU VABWINO MANINGE
14-15. Ko Yahova adzakwanirise tani polomisi yake yomalisa impfa?
14 Yesu manjeuno ni mpfumu kudzulu ndipo adzakwanirise vose vomwe Yahova adapolomisa. (2 Akor. 1:20) Kundochokera mu 1914, Yesu wakhala ankugonjesa adani wake. (Sal. 110:1, 2) Manjemanje, iye na womuthandizira adzachenekeretu woipa wose.—Chiv. 6:2.
15 Nkati mwa magole 1000, Yesu adzamukise wakufa ndipo wanthu wobvera adzawathandize kuti akhale wangwiro. Chiyeso chomalizira chikadzapita, wanthu omwe Yahova adzawaweruze kuti ni wolungama ‘adzatambire dziko yapasi ndipo adzakhalemo mpakana kalekale.’ (Sal. 37:10, 11, 29) Ndipo chokomedza pomwe nchakuti ‘impfa yomwe ni mdani womalizira, idzachenekewe.’—1 Akor. 15:26.
16. Ko cholinga chathu chikulu chimbakhale chani pokondweresa Yahova?
16 Ninge mwatawonera, chidikhiro chathu chakuti tidzakhale na moyo wosapera ni chochokera m’Mawu ya Mulungu. Chidikhiro chimwichi chingatithandize kuti tikhale wokhulupirika pogumana na mabvuto muntsiku zomalizira zino. Koma cholinga chathu pokondweresa Yahova osati chimbakhale kufuna kudzagumana moyo wosapera basi. Koma timbachite vimwevi ndawa yakuti tikonda maninge Yahova na Yesu. (2 Akor. 5:14, 15) Tikachita vimwevi tidzakhalembo wachikondi ndipo tidzakhale wakhama pouza anango va chidikhiro chathu. (Aro. 10:13-15) Tikapfunzira kukhala wachikondi na wopasa, Yahova angatibvumize kuti tikhale naye paushamwali mpakana kalekale.—Aheb. 13:16.
17. Ko tichadekana kupitiriza kuchita chani? (Mateyu 7:13, 14)
17 Ko isembo tidzatambire moyo wosapera? Inde, Yahova wapereka mwayi moyu kwa munthu aliyese. Ndipomwapa tichadekana kupitiriza kufamba panjira yotsogolera kumoyo. (Lewengani Mateyu 7:13, 14.) Ko vinthu vidzakhale tani tikadzakhala na moyo wosapera? Tidzakambirane mdawiro wa mbvunzo moyu munkhani yomwe ikubwera.
NYIMBO NA. 141 Moyo Ndi Wodabwitsa
a Ko imwepo munashungu yodzakhala na moyo wosapera? Yahova adapolomisa kuti idzafike nthawe yomwe tidzakondwe na moyo tichimbadziwa kuti tidzafelini pomwe. Munkhani ino tikambirane vifukwa vinango vomwe vititsimikizira kuti Yahova adzatipasedi moyo wosapera.
b Onani bokosi yakuti “Vomwe Baibolo ichatanthauza ikambati ‘mpakana kalekale.”
c MAWU YOFOTOKOZERA MAFOTO: M’bale wachikulire ankuganizira vomwe adzachite akadzakhala na moyo wosapera.