PFUNZIRO 18

Nkhani yopfunzisadi wanthu

1 Akorinto 9:19-23

MPFUNDO IKULU: Chitisani wanthu kuganizira va nkhani yanu pakuphatisa basa vinthu vochitisa chidwi.

Mumbaganizire vomwe wobvesera wanu achavidziwa kale. M’malo mombandobwerezera vomwe iwo achavidziwa kale, imwepo muchadekana kuvifotokoza munjira inango.

Mumbayesese kufotokoza mpfundo zinyowani, m’malo mwa kupeza nthawe itali munkufotokoza mpfundo zomwe wanthu achazidziwa kale.
Mumbafage-fage na kuganizira maninge nkhani mwiyo. Phatisirani basa vinthu vomwe vinkuchitika panango nyunzi zinyowani pakufotokoza mpfundo ikulu. Dzibvunzeni kuti: Ko vomwe nafaga-faga vinkubverana na nkhani yangu?

Kuti mukonzekere bwino nkhani yanu, muchadekana kudzibvunza kuti: ‘Ko inkulewa va mbani? Ko ankulewa chani? Ndawa chani? Ko nilini paidachitika? Ko vidachitikira kuti? Nakuti vidachitika tani?’ Mudzathandize maninge wobvera wanu mukambachita mibvunzo mwaya na kuyadawira nkati mwa nkhani yanu.
Mumbawonese phindu ya nkhani yanu. Fotokozani momwe Malemba yangathandizire wanthu pamoyo wawo wa ntsiku na ntsiku. Mumbafotokoze mpfundo zobverana na vomwe vichachitikira wanthu, vomwe wanthu achachita na kuganiza.