Danieli adathusiwa mu chidindi cha mphondolo

Nthawe inango Dariyo Mmedi, adayamba kutonga ku Babulo. Iye adawona kuti Danieli wenze na buya yapadera, pamwapo adamusankhula kuti akhale wa udindo komasoti kuti ambayang’anire wanthu waudindo anzake. Koma wanthu wa udindo anango adayamba kumuchitira djerasi ndipo ambafuna kumugumanira vifukwa. Iwo ambadziwa kuti Danieli ambakonda kupemphera kwa Yahova katatu ntsiku iriyose. Patsogolo pake, adauza Dariyo kuti: ‘Mpfumu mukhazikise lamulo yakuti aliyese ambapemphere kwa imwepo basi, munthu akaleka kubvera lamulo mweyi ambathusiwe mu chidindi cha mphondolo.’ Dariyo adabverana navo ndipo adakhazikisadi lamulo mweyi.

Danieli padandobva valamulo mweyi, adayenda kumuyi kwake. Ndipo janela yenze yofungula ndipo adagwada nkuyamba kupemphera kwa Yahova. Wanthu womwe ambamuchitira djerasi wale padamuona, adangena ndipo adamugumana ankupemphera. Patsogolo pake adathamanga kwa Dariyo nkukamuuza kuti: ‘Mpfumu, Danieli ankubveralini lamulo yanu, ankupitiriza basi kupemphera kwa Mulungu wake katatu ntsiku iriyose.’ Pakuti Dariyo ambakonda maninge Danieli, ambafunalini kuti aphewe ndipo ntsiku yose mweyo adayesesa kuti agumane njira yakuti amupulumusire. Koma ndawa yakuti viribe kukwanisika kuti munthu aliyese achinje lamulo yomwe mpfumu Dariyo yasayina, adalamula kuti Danieli athusiwe mu chidindi cha mphondolo.

Ntsiku mweyi Dariyo alibe kugona ndipo ambandoganizira va Danieli. Manje pakudachena adathamanga nkuyenda ku chidindi kule ndipo padafika adakuwa nkumubvunza Danieli kuti: ‘Ko Mulungu wako wakupulumusa?’

Danieli adadawira kuti: ‘M’ngelo wa Yahova wafunga pakamwa pa mphondolo mwakuti ziribe kunidzonga.’ Dariyo padabva vimwevi adakondwa maninge! Ndipo adalamula kuti Danieli abulisiwe mu chidindi mule. Iye adabulisiwa ndipo alibe kupsunduka palipose. Patsogolo pake, mpfumu idalamula kuti: ‘Thusani wanthu wose womwe ambafunira voipa Danieli. Padandowathusa mu chidindi mule mphondolo zire zidawadya.

Manje Dariyo adalamula wanthu wake wose kuti: ‘Aliyese ambatamande Mulungu wa Danieli ndawa wamupulumusa mu chidindi cha mphondolo.’

Ko iwepo upemphera kwa Yahova ntsiku iriyose ninge momwe ambachitira Danieli?