Vomwe Yefita adapolomisa

Aizirayeli adasiya pomwe kutumikira Yahova ndipo adayamba kutumikira milungu yabodza. Pomwe Aamoni adawaukira nkuyamba kumenyana nawo, milungu yabodza mwaya yalibe kuwathandiza. Aizirayeli adabonera kwa magole yazinji. Patsogolo pake, iwo adauza Yahova kuti: ‘Takuchimwirani pulizi tipulumuseni kwa Azondi wathu.’ Pamwapo Aizirayeli adachosa mafano yose ndipo adayambira pomwe kutumikira Yahova. Yahova ambafunalini kuti iwo ambandobonera.

Pamwapo wanthu mwawo adasankhula Efita kuti awatsogolere kukamenyana na Aamoni. Yefita adauza Yahova kuti: ‘Mukakanithandiza kuwina nkhondo mweyi, ninkukupolomisani kuti nidzapereke kwa imwepo munthu aliyese wa m’nyumba mwangu yemwe adzayambirire kubula nkudzanichunguzira.’ Yahova adadawira pemphero ya Yefita ndipo Aizirayeli adawinadi nkhondo mweyo.

Pomwe Yefita ambabwerera ku nkhondo muko, munthu woyamba kumuchunguzira wenze mwana wake nkazi. Ndipo iye wenze na mwana m’bodzi yekha basi, mwana moyu adamuchunguzira uku ankuvina komasoti ankuimba maseche. Ko manje Yefita adachita tani? Iye adakumbukira vomwe adapolomisa vile ndipo adalewa kuti: ‘Maine mwana wangu! Wanikalipisa, nidapolomisa kwa Yahova kuti nidzakwanirise polomisi mweyi manje nikutumize kuti umbakatumikire kukachisi ku Silo. Koma mwana wake muyo, adalewa kuti: ‘Ababa mufunika kuchita vomwe mudapolomisa, nikundokumbira kuti munibvumize niyende ku phiri na adzangu kwa minyezi yawiri patsogolo pake nidzayende kukachisi muko.’ Mwana wa Yefita adatumikira pakachisi mokhulupirika kwa moyo wake wose ndipo gole iriyose anzake ambayenda ku Silo kukamuona.