Hana adakumbira mwana

Mwamuna munango wa ku Izirayeli, wenze na akazi awiri, madzina ya azikazi mwawo enze Hana na Penina. Koma Elikana ambakonda maninge Hana, Penina wenze na wana azinji koma Hana wenze alibe olo m’bodzi. Ndawa ya vimwevi, Penina ambanyoza Hana nthawe zose. Gole iriyose, Elikana ambayenda kukatumikira Mulungu ku Silo pabodzi na banja yake. Koma ntsiku inango ali kumuko, Elikana adazindikira kuti Hana wenze wokhumudwa maninge. Iye adamuuza kuti: ‘Hana ayi kulira nikukonda maninge. Ko inepano ndinelini wofunika maninge kuposha wana womwe unkufuna awo?’

Patsogolo pake, Hana adanyamuka nkuyenda kukapemphera. Iye adakumbira Yahova kuti amuthandize ndipo ambapemphera uku ankulira mosatulusa mawu. Hana adapolomisa Yahova kuti: ‘Yahova mukanipasa mwana mwamuna nidzakupaseni kuti ambakakutumikireni kwa moyo wake wose.’

Manje nkulu wa antsembe dzina yake Eli padaona milomo ya Hana yankugwendera, ambanganiza kuti waledzera. Koma Hana adadawira kuti: ‘Neye mbuya wangu, inepano nilibe kuledzera. Ninabvuto ikulu maninge yomwe ninkufotokozera Yahova.’ Eli padazindikira kuti waphonyesa, adauza Hana kuti: ‘Mulungu akupase vomwe unkufuna ivo.’ Pamwapo Hana adayamba kubva bwino muntima mwake ndipo adabwerera. Gole ikalibe yamala, adabereka mwana nkumupasa dzina yakuti Samueli. Pamwapo Hana adakondwa maninge.

Hana alibe kuyebwa vomwe adapolomisa Yahova, Samueli padaleka kuyamwa adamupereka kuti ambakatumikire ku kachisi. Iye adauza Eli kuti: ‘Mwana uyu ni yemwe nimbakumbira nthawe ire, namupereka kuti atumikire Yahova kwa moyo wake wose.’ Gole iriyose Elikana na Hana, ambayenda kukaona Samueli ndipo ambamunyamulira Malaya yalibe manja. Yahova adapasa Hana wana anango amuna atatu na akazi awiri.