Rute na Naomi

Panthawe inango ku Izirayeli kwenze njala. Manje Naomi, adafuluka na mwamuna wake komasoti wana wake amuna awiri nkuyenda ku Mowabu. Ali kumuko mwamuna wa Naomi adamwalira, wana wake adalowola akazi, wa Chimowabu ndipo akazi mwawo enze Rute na Olipa. Koma kuyenda kwa nthawe, wana wake wale adamwalira pomwe.

Naomi adabva kuti njala ku Izirayeli yamala ndipo adaganiza vobwerera kwawo. Rute na Olipa adanyamuka nawo pabodzi ndipo ali munjira Naomi adawauza kuti: ‘Ndimwe akazi wabwino maninge, mudathandiza wana wangu komasoti inepano. Koma bwererani kwanu ku Mowabu ndipo mungakalowodwe pomwe.’ Rute na Olipa adalewa kuti: ‘Tikukondani maninge ndipo tinkufunalini kuti tikusiyeni.’ Naomi adawachichimiza kuti abwerere, patsogolo pake Olipa adabwerera koma Rute alibe kubwerera. Naomi adauza Rute kuti: ‘Iwe nyang’ana Olipa ankubwerera kwa wanthu wake na milungu yake iwepombo bwerera naye pabodzi yenda kwa azibereki wako.’ Koma Rute adalewa kuti: ‘Ningakusiyenilini, wanthu wanu adzakhale wanthu wangu ndipo Mulungu wanu adzakhale Mulungu wangu.’ Ko unkuganiza kuti Naomi adabva tani pomwe Rute adalewa vimwevi?

Rute na Naomi adafika ku Izirayeli nthawe yokolola balere idandoyamba. Ntsiku inango, Rute adayenda kukachita machanga ya balere m’munda mwa munthu munango dzina yake Bowazi. Munthu moyu wenze mwana wa Rahabi, padabva kuti Rute wenze wa ku Mowabu komasoti ambakhala na Naomi, adauza anyabasa wake kuti ambamusiyire balele munango kuti ambalokote.

Ntsiku inango Rute padabwerera kumaulo, Naomi adamubvunza kuti: ‘Ko lero umbakachita kuponi machanga ya balere?’ Rute adadawira kuti: ‘M’munda mwa amuna anango dzina yawo a Bowazi.’ Manje Naomi adalewa kuti: ‘Moyu ni wachibale wa amuna wangu, nthawe zose umbayende m’munda mwawo pabodzi na atsikana wawo ndipo angakuchitelini choipa.’

Rute ambayendadi kumunda kwa Bowazi mpakana pomwe nthawe yokolola idamala. Bowazi adaona kuti Rute ambaphata basa mwakhama ndipo wenze nkazi wabwino maninge. Kalekale munthu akamwalira alibe mwana, m’bale wake ambalowola nkazi wamasiye moyu. Pamwapo Bowazi adalowola Rute, iwo adabereka mwana mwamuna dzina yake Obedi. Anzake wa Naomi adakondwa maninge, iwo adalewa kuti: ‘Yahova adakupasa Rute ndipo wakhala ankukuthandiza maninge, manje wakupasa mzukulu, Yahova atamandike.’ Obedi adakhala ambuya wake wa Mpfumu Davide.’