Mulungu adalenga wanthu awiri oyambirira

Yahova adakonza munda wa Edeni, m’munda momu mwenze mafololi na miti yazinji, mwenze pomwe nyama zosiyanasiyana. Patsogolo pake, adatenga dongo nkuumba munthu dzina yake Adamu. Iye adafulizira mphuwe m’mphuno mwa Adamu muyo. Ko unkudziwa vomwe vidachitika? Munthu muyo adakhala na moyo. Adamuuza kuti ambanyang’anire munda muyo komasoti nyama iriyose aipase dzina.

Koma Yahova adamupasa pomwe lamulo yodekana maninge yakuti: ‘Vipaso va muti uliwose wa m’munda momu umbadye, kuchosapo vipaso va m’muti ubodzi wokha ukadzadya vipaso va m’muti moyu udzafe.’

Patsogolo pake, Yahova adalewa kuti: ‘Ninkufuna nikonze munzake wa Adamu.’ Manje adamugonesa tulo Adamu ndipo adamuchosa nthiti na kuphatisira basa nthiti mwiyo kumukonzera nkazi, nkazi muyo dzina yake wenze Hava. Kundoyambira pamwapo Adamu na Hava yenze banja yoyamba. Ko Adamu adabva tani Mulungu padamukonzera nkazi? Adakondwa maninge ndipo adalewa kuti: ‘Ninkukondwa maninge ndawa yakuti Yahova waphatisa basa nthiti yangu nkunikonzera nkazi, manje nagumana munzangu.’

Yahova adauza Adamu na Hava kuti akhale na wana komasoti adzaze dziko yapasi. Ambafuna kuti wanthu mwawo ambaphate basa pabodzi mokondwa kukonza dziko yose kuti ikhale paradayiso wokhuza ninge wenzele munda wa Edeni. Koma vinthu viribe kuchitika ninge momwe Yahova ambafunira. Ko unkudziwa ndawa yake? Tidzakambirane vimwevi mu msolo unkubwera.