Mulungu adalenga kudzulu na dziko yapasi

Yahova Mulungu ni yemwe adatilenga, koma tingakwaniselini kumuona, iye adalenga pomwe vinthu vose vomwe tinkuviona ivi komasoti vomwe tingakwaniselini kuviona. Koma akanati walenga vinthu vomwe tiviona ivi, adalenga angelo azinji. Ko uwadziwa angelo? Angelo ni wosiyana na wanthu ndipo nawombo tingakwaniselini kuwaona. Mngelo woyamba kulengewa adathandiza Yahova kulenga vinthu vose. Adamuthandiza kulenga vinthu ninge nyenyezi na mapulaneta, ibodzi mwa mapulaneta mwaya ni dziko yapasi yokhuza yomwe tinkukhala ino.

Patsogolo pake, Yahova adalenga dziko yapasi kuti pambakhale vinyama na wanthu. Adakonza pomwe kuti kugaka kwa dzuwa kufike padziko yapasi komasoti adalenga mapiri, nyanja na tukamadzi.

Ko unkudziwa vomwe adachita patsogolo pake? Yahova adalewa kuti: ‘Nikonze udzu, miti na vinango vomera. Patsogolo pake, padziko yapasi padayamba kumela miti ya vipaso, mafololi komasoti vinthu vinango. Patsogolo pake adalenga nyama zosiyanasiyana, zinango zobululuka, zinango za m’madzi ndipo zinango zokwawa. Adalenga pomwe nyama zinango zing’onozing’ono ninge akalulu na zinango zikuluzikulu ninge nzowu. Ko ni nyama iponi yomwe ukomedzewa nayo?

Patsogolo pake, Yahova adauza mngelo woyamba ule kuti: ‘Nabo tikonze munthu.’ Wanthu adalengewa mosiyana na vinyama, ndawa akwanisa kukonza vinthu, kuyankhula, kuseka komasoti kupemphera. Yahova adauza wanthu mwawo kuti ambanyang’anire dziko yapasi na vinyama. Ko unkudziwa kuti munthu woyamba kulengewa wenze mbani? Tione vimwevi mu msolo unkubwera.