Ko Ufumu wa Mulungu ni chani?

1. Ko Ufumu wa Mulungu ni chani?

Ufumu wa Mulungu ni boma yomwe ili kudzulu. Mulungu adzaphatise basa boma mweyi kuti akwanilise vomwe angada pasi pano na kudzulu. Mweyi ndiyo boma yichadikana. Mulungu adzachose maboma yose achiyikhiratu yake yomwe idzabveranise wanthu. Ko muchawonalini kuti moyu ni Ntontholo wabwino? — Lewengani Danieli 2:44; Mateyu 6:9, 10; 24:14.

Boma iliyose ichakhala na Mpfumu. Yahova adasalula mwana wake Yesu kuti adzatonge mu Boma mweyi. — Lewengani Chivumbulutso 11:15.

2. Ndawa chani Yesu ni Mpfumu yabwino?

Yesu ni Mpfumu yabwino ndawa ni wabwino mtima ndipo ni wachilungamo. (Mateyu 11:28-30) Yesu anamphanvu zakubatsira wanthu ndipo adzatonge ali kudzulu. Padabwerera kudzulu, iye adadikhira kuti apasiwe Ufumu. (Aheberi 10:12, 13) Manjewuno iye ankutonga kudzulu, ndipo adapasiwa kale mphanvu kuti adzatonge dziko yose. — Lewengani Danieli 7:13, 14.

3. Ko Yesu adzatonge na mbani?

Mulungu ankusalula kagulu ka wanthu kuti adzatonge pabodzi na Yesu kudzulu. Baibolo ichachemera kagulu mwaka kuti ‘wakuchena.’ (Danieli 7:27) Wakuyamba kusaluliwa enze Atumi wakukhulupirika wa Yesu. Nalero, Yahova akali kusalula akume na achembere kuti akhale mu kagulu mwaka. Iwo akafa achamukisiwa kuti akakhale na moyo kudzulu. — Lewengani Yohane 14:1-3; 1 Akorinto 15:42-44.

Ko ni angasi omwe adzatonge na Yesu kudzulu? Yesu adawachemera kuti ‘kagulu ka nkhosa.’ (Luka 12:32) Pa wose alipo 144.000, wanthu womwe adzatonge dziko yapasi pabodzi na Yesu. — Lewengani Chivumbulutso 14:1.

4. N’chani chadachita Yesu padakhala Mpfumu kudzulu?

Chinthu chakuyamba chomwe Yesu adachita, adathamangisa Satana na viwanda vake kudzulu, nkuvithusira pa dziko yapasi. Padavithusapo mwenze mu 1914.a Satana ankubweresa mabvuto padziko ndawa anawukali kuchokera nthawe yomwe adathusiwa. (Chivumbulutso 12:7-10, 12) Kundochokera mwapo, vinthu vakhala vikuyipa maninge. Ntsiku zino kunanjala, nkhondo vivomezi na matenda. Vimwevi ni vizindikiro vakuti nthawe yakuti Boma ya Mulungu iyambe kutonga yasala pang’ono. — Lewengani Luka 21:7, 10, 11, 31.

5. Ko Boma ya Mulungu inkuchita chani?

Boma ya Mulungu inkubatsira wanthu azinji kudziwa mawu ya Mulungu. Mamiliyoni ya wanthu padziko yose ali m’boma mweyi. Iwo achabvera mpfumu yawo ndipo achakondana. Pakudzapha wanthu wakuyipa, iwo adzapulumusiwe. Aliyese yemwe achada kudzapulumuka, achadekana kubvera Yesu. — Lewengani Chivumbulutso 7:9, 14, 16, 17.

Mkati mwa magole 1.000, Mulungu adzaphatisire basa Ufumu wake kuti akwanise chakulinga chake chakuyambirira. Vimwevi vikadzachitika, Yesu adzapereke Ufumu moyu kwa Ababa wake. (1 Akorinto 15:24-26) Ko pali munthu yemwe muchada kumuwuzako za Boma mweyi? — Lewengani Salimo 37:10, 11, 29.