Ko apainiya anamwayi wongena shikola ziponi?

Kundochokera kale-kale, gulu ya Mboni za Yahova yakhala inkupfunzisa wanthu pakuphatisira basa mashikola yosiyana-siyana. Mapfunziro yapadera mwaya, yachaperekewa kwa omwe achadzipereka mu utumiki wa nthawe zose pa kulalikira va Ufumu kuti ‘akwanirise mbali zose za utumiki wawo.’ —2 Timoteyo 4:5.

Shikola ya utumiki wa upainiya. Mpainiya wokhazikika akamaliza gole ibodzi, achachemerewa kuti akangene shikola ya ntsiku 6. Cholinga ni kuthandiza mpainiya kufenderera Yahova, kukhala wabuya mu umboni na kupitiriza kutumikira mwakhama.

Shikola ya Akhrisitu olalikira va Ufumu. Shikola ya minyezi yawiri mweyi, idakonzewa kuti itherene apainiya wabuya womwe ni wokonzeka kuyenda kukatumikira komwe kuchada olalikira azinji. Mwakutewedzera Mulaliki nkulu Yesu Khrisitu yemwe adatumikirako padziko, vichakhala ninge ankulewa kuti: ‘Inepano nilipo! Nitumizeni!’ (Yesaya 6:8; Yohane 7:29) Munthu akachinja nkuyenda kutali, panango achadikana kukakhala na moyo wosafuna vizinji. Angashupike kuzolowera chikhalidwe, vakudya, kutentha panango kuzizira, vingakhale vosiyana na vomwe adadjaira. Nthawe zinango angafike pakupfunzira chiseweredwe chanyowani. Shikola mweyi ichathandiza abale na alongo wosalowola na wapabanja wa magole 23 mpakana 65, kukulisa makhalidwe yawuzimu na kukulisa luso kuti aphatisiriwe basa na Yahova pabodzi na gulu yake.

Shikola ya Giliyadi yopfunzisa Baibolo. Mu Chiheberi, mawu yakuti ‘Giliyadi’ yachathandawuza ‘nthutu ya umboni.’ Kundochokera pomwe shikola mweyi idayamba mu 1943, wanthu woposha 8 midyawu adatherenewa achitumikiziwa ‘mpakana kumamaliziro kwa dziko’ ninge amishonale, ndipo vimwevi vakhala na maphindu yazinji. (Machitidwe 13:47) Pomwe amishonale wathu adafika ku Peru, adagumana kuti mudziko mwiyo mwenzebe mpingu olo ubodzi, koma ntsiku zino, kunamipingu yoposha 1.000. Pomwe adayamba kulalikira ku Japão, kwenze Mboni za Yahova zokwana 10 basi. Koma ntsiku zino, kunamboni zoposha 200 midyawu. Apainiya wapadera, amishonale, atumiki wa pa Beteli na wonyang’anira madera, ndiwo angachemerewe kukangena shikola mweyi ya mapfunziro yamphanvu, na cholinga chakuwalimbisa na kuwakonzekeresa pa basa yapadziko yose.

• Ko cholinga cha shikola ya utumiki wa upainiya nchani?

• Ko ni mbani angangene shikola ya Akhrisitu olalikira va Ufumu?