Mbvunzo wosashupa womwe ungabwerese maphindu yazinji

Mary na mwamuna wake John,a akhala mbali inango ya dziko yomwe ntontholo wabwino ungalalikiriwe kwa wanthu azinji maninge ophata basa ochokera ku Filipinas. Pa nthawe ya Koronaviru, Mary adayambisa mapfunziro ya Baibolo mu dziko yake komasoti m’madziko yanango. Ko iye adachita tani vimwevi?

Mary ambabvunza mapfunziro yake ya Baibolo kuti: “Ko munkudziwako munthu munango yemwe angakonde kupfunzira Baibolo?” Akadawira kuti inde, iye ambabvunza pomwe kuti: “Ko munganithandize kudziwananawo?” Kuchita mbvunzo wosashupa moyu, kazinjikazinji kubweresa maphindu yazinji maninge. Ko ndawa chani? Ndawa yakuti wanthu azinji omwe achita chidwi na mawu ya Mulungu nthawe zizinji akhala na chifuno chouza wanthu anango vomwe ankupfunzira ninge azibale wawo na azishamwali omwe iwo awakonda. Ko phindu yenze iponi ndawa yochita mbvunzo moyu?

Pfunziro ya Baibolo ya Mary, Jasmin, adamudziwikisa Mary kwa mapfunziro yanango yanyowani ya Baibolo yanayi. M’bodzi mwa iwo Kristine, ambakonda maninge pfunziro ya Baibolo mwakuti adakumbira Mary kuti ambapfunzire naye kawiri pa sondo. Pomwe Mary adamubvunza peno pana anango omwe angakonde kupfunzira Baibolo, Kristine adanena kuti: “Inde nikudziwikiseni kwa azishamwali wangu.” Kwa masondo yang’onong’ono Kristine adachitisa kuti Mary adziwane na azishamwali wake anayi omwe ambafunambo kupfunzira. Patsogolo pake, Kristine adamudziwikisa pomwe kwa azishamwali wake anango ndipo anango mwa iwo adachitambo chimbodzimbodzi.

Kristine ambafuna kuti wanthu wa m’banja yake ku Filipinas apfunzirembo Baibolo. Patsogolo pake adayankhula na mwana wake Andrea. Pakuyamba Andrea ambaganiza kuti ‘wamboni za Yahova ni wanthu wampatuko ndipo andophatisa basa Chipangano chakale.’ Koma pomwe adandopfunzirako kambodzi, maganizo yake yophonyeka mwaya yadamala. Ndipo nkati mwa pfunziro iye ambayankhula kuti: “Peno Baibolo inkulewa vimwevi ndiye kuti nchaivo!”

Kuyenda kwa nthawe, Andrea adamudziwikisa Mary kwa azishamwali wake awiri na munzake m’bodzi wakubasa yemwe adayamba kupfunzira. Kuingizira mwapa, Mary ambadziwalini kuti atitiya wake wa Adrea dzina yawo Angela ambabva pomwe ambapfunzira. Manje ntsiku inango Angela adakumbira Andrea kuti amudziwikise kwa Mary ndipo adakumbira kuti ambapfunzire naye Baibolo. Angela ambakonda maninge vomwe ambapfunzira. Kwa mwezi m’bodzi iye adadekorali malemba yazinji maninge mu msolo ndipo ambafuna kuti ambapfunzire kanayi pa sondo. Ndipo adayamba kugumanika pa misonkhano nthawe zose pakuphatisa basa videoconferência mwakuthandiziwa na Andrea.

Pomwe Mary adadziwa kuti mwamuna wa Kristine dzina yake Joshua, ambakhala pafupi pomwe ambapfunzira na Kristine, Mary adamubvunza Joshua kuti peno ankufuna kumbapfunzira nawo pabodzi. Iye adadawira kuti: “Nindobvesera basi koma ayi kunichita mibvunzo mukandonichita mibvunzo nichokepo.” Pomwe adandopfunzirako kwa maminuto 5 iye adachita mibvunzo yazinji maninge kuposha Kristine ndipo adafuna kupitiriza kupfunzira.

Mbvunzo wosashupa wa Mary udachitisa kuti ayambe kupfunzira Baibolo na wanthu azinji maninge. Ndawa yakuti wenze na mapfunziro yazinji maninge iye adakonza vakuti mapfunziro yanango yambapfunzisiwe na abale anango. Pa yose, Mary adayambisa mapfunziro ya Baibolo 28 m’madziko yanayi yosiyana.

Jasmin, yemwe ni pfunziro yoyamba yomwe yatomolewa mu nkhani mweino, adabatizika mu Abril 2021. Kristine adabatizika mu Maio 2022 ndipo adabwerera ku Filipinas kuti akakhale na banja yake. Ndipo mapfunziro yanango yawiri yomwe Kristine adawauza va Mary adabatiziwambo. Angela adabatiziwa minyezi yanganani patsogolo pake ndipo ankutumikira ninge mpainiya wokhazikika. Mwamuna wake wa Kristine Joshua na mwana wake Andrea pabodzi na mapfunziro yanango yazinji ankupitiriza kupita patsogolo.

M’magole ya kuyambirira chonandi chidafalikira mwakankulumize kupitira mwa azibale na azishamwali. (Yoh. 1:41, 42a; Mac. 10:24, 27, 48; 16:25-33) Tani kubvunza mapfunziro yanu ya Baibolo na wanthu anango wachidwi kuti: “Ko munkudziwako munthu munango yemwe angakonde kupfunzira Baibolo?” Mbani ankudziwa, panango muchibvunza mbvunzo wosahupa moyu imwepo mungayambise mapfunziro yazinji maninge.