Ko mu na chikhulupiriro?

Kuti tikondwerese Yahova tichadekana kukhala na chikhulupiriro. Koma Baibolo inena kuti ‘ni wanthulini ose omwe anachikhulupiriro.’ (2 Ates. 3:2) Ntumi Paulo adalewa va omwe ambamudzudza kuti ni ‘wanthu oipa maninge’ ndipo iye ambadekana kupulumusiwa. Koma mawu yake yolewa va chikhulupiriro yanatanthauzo ikulu. Wanthu anango achanyalanyaza umboni wakuti Mulengi aliko. (Aro. 1:20) Anango aganiza kuti anachikhulupiriro ndawa yodzibva kuti anamphanvu maninge. Koma chikhulupiriro mwechi pachokha tingakondwereselini nacho Yahova.

Tichadekana kutsimikiza kuti Yahova aliko nakuti iye achadalisa wale omwe anachikhulupiriro cholimba. (Aheb. 11:6) Chikhulupiriro ni chipatso cha mzimu uchena. Tikambapemphera kwa Yahova iye angatipase mzimu uchena. (Luka 11:9, 10, 13) Chinthu chomwe chingatithandize maninge kutambira mzimu uchena ni kuwerenga Mawu youziriwa ya Mulungu, kuyaganizira na kuphatisa basa vomwe tapfunzira. Mzimu wa Yahova udzatithandize kukhala na chikhulupiriro chomwe chingamukondwerese.