Mibvunzo Yochokera Kwa Olewenga
Pa Salimo 61:8, Davide adanemba kuti adzatamande dzina ya Mulungu ‘mpakana kalekale.’ Ko pamwapa ambatanthauza kuti adzafelini?
Neye. Vomwe iye adanemba ni vazedi.
Ndowonani vadanemba mu vesi mwiyi na m’malo yanango. Adati: ‘Nidzaimbe nyimbo zotamanda dzina yanu mpakana kalekale pakukwanirisa mapolomisi yangu ntsiku na ntsiku.’ ‘Nidzakutamandeni imwepo Yahova Mulungu wangu na mtima wangu wose, ndipo nidzatamande dzina yanu mpakana kalekale.’ ‘Nidzatamande dzina yanu mpakana kalekale, inde mpakana muyaya.’—Sal. 61:8; 86:12; 145:1, 2.
Pamwapa sikuti Davide ambanyanyira nkumbadzinamiza kuti adzafelini. Iye ambadziwa bwino kuti uchimo wa wanthu udabweresa impfa. Ndipo iye ambazindikira pomwe kuti ni wochimwa. (Gen. 3:3, 17-19; Sal. 51:4, 5) Iye ambadziwa pomwe kuti Abulahamu, Isaki na Yakobo omwe ambakondewa na Mulungu, adafa. Ndipo Davide ambadziwa kuti iyembo adzafe. (Sal. 37:25; 39:4) Mawu yomwe iye adanemba pa Salimo 61:8 yakundowonesa kuti iye wenze na shungu yofuna kukondweresa Mulungu panthawe yose yomwe anamoyo.—2 Sam. 7:12.
Pa Masalimo 18, 51 na 52, pankuwonesa kuti nthawe zinango Davide ambanemba vomwe vimbamuchitikira pamoyo wake. Mu Salimo 23, iye adafotokoza kuti Yahova ni nyakabusa yemwe ambamutsogolera bwino, kumulimbikisa na kumuteteza. Davide wenzembo nyakabusa ndipo ambafuna kutumikira Mulungu ‘ntsiku zose za moyo wake.’—Sal. 23:6.
Kumbukirani kuti vomwe Davide adanemba adachita kuuziriwa na Yahova. Iye adanemba pomwe maulosi yomwe yadadzakwanirisika kutsogolo maninge. Mwakulinganiza, pa Salimo 110, Davide adatomoleratu nthawe yomwe Ambuya wake ‘adzakhale pampando kudzulu kudjanja yamakulu ya Mulungu’ na kutambira mphanvu zizinji. Kupasiwa mphanvu kuti achite nazo tani? Kuti agonjese adani wa Mulungu nakuti ‘aweruze makhaindi ya wanthu’ padziko yapasi. Mesiya adakachokera m’banja ya Davide nkumbatonga ali kudzulu na kukhala ‘wantsembe mpakana kalekale.’ (Sal. 110:1-6) Yesu adatsimikizira kuti ulosi wa pa Salimo 110 unkulewa va iye ndipo udzakwanirisike pomwe kutsogolo.—Mat. 22:41-45.
Yahova adatsogolera Davide kunemba vinthu vomwe vidadzachitika munthawe yake ndipo vidzachitike pomwe kutsogolo akadzamukisiwa nkupitiriza kutamanda Yahova mpakana kalekale. Vimwivi vinkutsimikizira kuti mawu ya pa Salimo 37:10, 11, 29 yankufotokoza vinthu vomwe vidachitika munthawe ya Aizirayeli ndipo vidzachitike pomwe padziko yose kutsogolo Mulungu akadzakwanirisa mapolomisi yake.—Onani ndime 8 ya munkhani yakuti “Udzakhale na ine m’Paradaiso” mu ntsanja mwaino.
Lemba ya Salimo 61:8 na mavesi yanango yolinganako na mwiyi, yankuwonesa kuti Davide ambafuna kutamanda Mulungu panthawe yose ya moyo wake. Ndipo yankuwonesa pomwe vomwe Davide adzachite akadzamukisiwa na Yahova kutsogolo.