Ko muphatisa basa bwino Baibolo yotepa?

Ko Baibolo yotepa nchani? Baibolo yotepa, ni mawu yotepewa kuchokera mu Baibulo la Dziko Latsopano yokonzewa pomwe. Mawu yotepa ya m’Baibolo mwaya yambayende yachiikhiwa pang’onopang’ono mu viyankhulo vizinji. Chokomedza maninge na Baibolo yochita kutepa mweyi, ni chakuti adaphatisa basa mawu ya wanthu osiyanasiyana potepa nkhani. Adatepa ninge momwe wanthu wa m’Baibolo angabvera ndipo vimwevi vichitisa kuti nkhani imbabvekedi kuti ni chaiyo.

Ko anango ankuphindula tani na Baibolo yotepa? Wanthu azinji womwe abvesera kawirikawiri Baibolo yochita kutepa akomedzewa maninge ndawa yakuti nkhani zibveka bwino. Iwo akambabva mawu yosiyanasiyana ya wanthu, aibvesa bwino nkhani ndipo achita ninge ankuwona vomwe vikuchitika. (Miy 4:5) Azinji awona kuti kubvesera Baibolo yochita kutepa iwathandiza akakhala na nkhawa.—Sl 94:19.

Kubva Mawu ya Mulungu yankuwerengewa mokuwa kungatifike pamoyo. (2Mb 34:19-21) Peno Baibolo yotepa inkugumanika mbali yake panango yose mu chiyankhulo chomwe muchabva, mungachite bwino kumbaibvesera nthawe zose.

NYANG’ANIRANI VIDIYO YAKUTI KUTEPA BAIBOLO—MBALI YAKE, NDIPO IKAMALA DAWIRANI MBVUNZO UYU:

Ko nchani chakukomedzani pamwawona momwe vichakhalira kuti Baibolo itepewe?