Momwe mungathandizire kukachitika chivomezi

Vivomezi vikuchitika maninge ntsiku zino. Chikandochitika chivomezi, pachitiwa makonzedwe yakuti abale ayenderetu kukathandiza. Ndipomwa, Bungwe Yotonga idakhonza vakuti ofesi ya nthambi iliyose ikhale na Dipatimenti Yothandiza Kukachitika Chivomezi.

Abale wa mu Dipatimenti mweyi akandobva kuti kwachitika chivomezi, nthawe mweyo afonera akulu kuti adziwe kuti ofalisa angafunikire kuthandiziwa chani na chani. Peno vinthu vomwe vinkufunika ni vakuti ofalisa angakwaniselini paokha, ofesi ya nthambi itumiza abale oyenerera kuti akathandize. Abale mwawa nthawe zinango angakumbire abale na alongo anango kuti athandizire kukumbira vinthu kuti aphatisire basa panango kuwona peno kudera komwe kwachitika chivomezi vingakwanisike kugulira muko.

Tiphindula maninge tikambachita vinthu mwanjira mweyi. Vichitisa kuti osati tidzonge mphanvu zathu papezi, tipewa chisokonezo na kudzonga kobiri zizinji na vinthu va gulu. Vikakhala teno tipewa kuti abale osati ayambe kudzithandiza okha.

Abale otumiwa na ofesi ya nthambi angawone kuwanda kwa kobiri zomwe zikufunika nakuti pangafunike wanthu angasi othandizira. Iwo angawone pomwe peno kudera mweyo kuli kale abale na alongo womwe adzipereka nthawe zose kukachitika chivomezi. Ndipomwapa wanthu paokha afunikalini kumbayamba kutsonkhesa kobiri, kugula vinthu na kutumizira abale pokhapokha peno achita kuuziwa.

Koma pakachitika chivomezi tifuna kuthandiza. (Ahe 13:16) Pakuti tikonda maninge abale wathu, ko tingachite chani? Chofunika maninge ni kupempherera womwe agwerewa na matsoka na abale omwe ayenda kukathandiza. Tingachite pomwe voperera kuti vithandizire basa yapadziko yose. Motsogolerewa na Bungwe Yotonga, maofesi ya nthambi yawona momwe kobiri zingaphatisiriwe bwino basa. Peno tinkufuna kuthandizirambo, tingachite bwino kudzadza fomu yakuti Petição Para Voluntário do Departamento Local de Projeto/Construção (DC-50).

NYANG’ANIRANI VIDIYO YAKUTI KUSEFUKIRA KWA MADZI KU BRASIL, NDIPO IKAMALA DAWIRANI MBVUNZO UYU:

Nchani chakuchitisani chidwi mukawona momwe Mboni za Yahova zidathandizira payadasefukira madzi ku Brasil mu 2020?