MOYO WATHU WACHIKHRISITU
Yesesani kumbaganiza ninge Mulungu
Tichadekana kumbakondweresa Yahova pa vose vomwe tinkuchita. (Miy 27:11) Kuti tikwanise kuchita vimwevi, tikafuna kusaina vochita pankhani iliyose timbayambe tazindikira kuti Yahova aiwona tani nkhani mweyo podiya kuti palibe lamulo yoleweratu sitiriti. Ko nchani chingatithandize kuti tichite vimwevi?
Mumbapfunzire Baibolo nthawe zose. Nthawe iliyose yomwe tinkulewenga Baibolo, vikhala ninge kuti tinkucheza na Yahova. Tingadziwe momwe Yahova achaganizira tikambawona momwe iye adachitira vinthu na wanthu omwe adachita vabwino na anango omwe adachita voipa. Tikafuna kusaina vochita, mzimu wa Mulungu ungatikumbuse mpfundo zomwe tidapfunzira m’Mawu yake.—Yoh 14:26.
Mumbafagefage. Mukafuna kusaina vochita, mumbayambe mwadzibvunza kuti: ‘Ni mavesi yaponi panango nkhani za m’Baibolo zomwe zinganithandize kudziwa momwe Yahova achaganizira pankhani mweyi?’ Pempherani kwa Yahova kuti akuthandizeni ndipo mumbafagefage pophatisa basa vinthu vomwe vilimo muchiseweredwe chanu kuti mugumane mpfundo zomwe zinkubverana na vomwe munkufuna kusaina.—Sl 25:4.
NYANG’ANIRANI VIDIYO YAKUTI ‘TIMBATHAMANGE MOPIRIRA’—MUMBADYE CHAKUDYA CHABWINO, NDIPO IKAMALA DAWIRANI MIBVUNZO AYA:
Ko mulongo wachitsikana watawona muvidiyo adagumana na mabvuto yaponi?
Ko muchigumanambo na mabvuto ninge mwaya, mungaphatise basa tani vitsulo vathu vofagira?
Ko kuyesesa kufagafaga na kupfunzira patekha mwakhama kungatithandize tani kuti tisalule bwino?—Ahe 5:13, 14