Mbathembani Yahova pomwe mapeto ya dziko ino yankufendera

Manjemanje Yahova aleke kudekhera wanthu woipa wa mudziko ino. Vipembedzo vabodza vidzadzongewe, magulu ya wanthu yadzaukire atumiki wa Mulungu ndipo Yahova adzacheneke wanthu woipa pa Arumagedo. Atumiki wa Mulungu ankudikhira kuti vimwevi vichitike.

Koma tinkudziwiratulini vose vomwe vidzachitike pa chisautso chikulu. Mwakulinganiza, tinkudziwalini nthawe chaiyo yati chisautso chimwechi chidzayambe. Tinkudziwalini pomwe chati chidzachitise kuti maboma yandale yacheneke vipembedzo vabodza. Tinkudziwalini kuti kuukiriwa kwa atumiki wa Mulungu kudzatenge nthawe itali tani na vomwe vidzachitike pakuwaukira. Tinkudziwalini pomwe kuti Yahova adzaphatise basa chani pakudzonga woipa pa Arumagedo.

Koma Malemba yankutiuza vinthu votithandiza kuti tidzakhale wolimba moyo na kuthemba Yahova vimwevi vikambadzachitika. Mwakulinganiza, tinkudziwa bwino kuti tili kumapeto chaiko kwa ‘ntsiku zomalizira.’ (2Ti 3:1) Tinkudziwa kuti vipembedzo vabodza vidzadzongewe ‘muntsiku zing’onong’ono’ kuti chipembedzo chaicho osati chidzongewembo. (Mt 24:22) Tinkudziwa kuti Yahova adzapulumuse atumiki wake. (2Pe 2:9) Tinkudziwa pomwe kuti Yahova adasankhula munthu wachilungamo na wamphanvu kuti adzacheneke wanthu woipa na kupulumusa wabwino pa Arumagedo.—Chv 19:11, 15, 16.

Vinthu vati vidzachitike kutsogolo uku, vidzachitise kuti wanthu azinji ‘adzakomoke na mantha.’ Koma kuwerenga na kuganizira momwe Yahova adapulumusira wanthu wake kalekale, kungatithandize kuti ‘tidzaime pulu na kutukula misolo yathu’ ndawa yoona kuti chipulumuso chathu chafendera.—Lu 21:26, 28.