Basa yapadera yoyambisa mapfunziro ya Baibolo mu Setembro

Mu Setembro, tidzakhale na basa ikulu maninge yoyambisa mapfunziro ya Baibolo pakuphatisira basa bulosha yakuti Kondwani na moyo mpaka kalekale! Wofalisa angasalule kudzachita upainiya wothandiza wa maola 30 basi. Ko tingadzachite chani kuti tidzatenge nawo mbali pa basa mweyi yapadera?

• Pa ulendo woyamba: Phatisirani basa khava yakumapeto ya bulosha ndipo kulisani chidwi cha munikachiro muyi ndipo muwoneseni momwe tichachitira pfunziro. Kumbukirani wale womwe adawonesa chidwi pa ulendo woyamba na pa ulendo wobwereza. Olo kuti wenze adalamba kale kupfunzira nase Baibolo panango angabvume na njira inyowani mweyi pakuphatisa basa bulosha. Ayi kusiya bulosha mweyi pa muyi pomwe palibe wanthu, olo kwa wale womwe adawonesa chidwi koma tilibe kuwagumana pa muyi. Komiti ya utumiki ya mpingo ichite makonzedwe yoingizira ya nsonkhano wa utumiki nkati mwa mwezi.

• Mipata yanango: Peno mpingo wanu uchaphatisa basa tumashelufu, mumbaikhe bulosha yakuti Kondwani na moyo mpaka kalekale! pa malo yowonekera. Afotokozereni wanthu womwe awonesa chidwi kuti bulosha mweyi tiyiphatisa basa pa kupfunzira na wanthu Baibolo fovolo. Awoneseni mwachigwato momwe tichachitira pfunziro apo neye mungakawawonese mukadzayenda pomwe. Wonyang’anira utumiki angachite makonzedwe yakuti wofalisa woyenerera ambayende m’malo yogulisira vinthu nkukayambisa mapfunziro ya Baibolo. Mungachitise pomwe mapfunziro ya Baibolo anzanu wakubasa panango wanthu womwe muchagumana nawo pomwe munkuchita umboni wa mwamwayi.

Yesu adatilamula kuti ‘yendani mukapfunzise wanthu.’ (Mt 28:19, 20) Basa mweyi yapadera itithandize kukwanirisa chakulinga chathu chimwechi pakuphatisa basa bulosha yakuti Kondwani na moyo mpaka kalekale!