Mpfundo zothandiza kuti nsonkhano wa utumiki uchitike bwino

Molingana na misonkhano yose ya mpingu, nsonkhano wa utumiki ni makonzedwe ya Yahova yakuti timbalimbikisane pa chikondi na pabasa zabwino. (Ahe 10:24, 25) Nsonkhano moyu ungachitike kwa maminutu 5 panango 7 yomwe yankuphatanidzapo kugawa wofalisa, kupereka magawo na kuchita pemphero. (Peno nsonkhano moyu unkuchitika payamala misonkhano yanango, ungachitiwe m’maminutu yocheperatu.) Wochitisa nsonkhano achadekana kukonzekerako mbali yomwe ingathandize womwe ankufuna kuyenda mu umboni ntsiku mweyo. Mwakulinganiza, ikakhala ntsiku ya Satade yomwe kazinjikazinji pabwera wanthu womwe alibe kubwera sondo yapita, mpofunika kufotokoza vomwe tingakalewe mu umboni. Ko ni nkhani zinango ziponi zomwe zingakhale zothandiza pa nsonkhano moyu?

• Vitsanzo va ulaliki vogumanika mu Utumiki na moyo wathu wachikhrisitu—Ndandanda ya misonkhano

• Momwe tingaphatisire basa nkhani zomwe zachitika manjemanje pakuyambisa macheza

• Vatingachite peno munichiro muyi walamba kuti ticheze naye

• Momwe tingakambirane na munthu yemwe akhulupiriralini kuti kuli Mulungu, wokhulupirira kuti vamoyo vidachita kuchinja, woyankhula chiseweredwe chinango, panango munthu yemwe ali muchipembedzo chomwe chinkugumanikalini mudera yanu

• Momwe tingaphatisire basa vinthu va pa saiti yathu ya jw.org, aplikativo ya JW Library^® panango Baibolo

• Momwe tingaphatisire basa chinthu chomwe chiri mugulu ya vomwe tichaphatisa basa pakupfunzisa

• Vatingachite kuti vitifambire pakulalikira pafoni, m’makalata, kulalikira malo yogumanika wanthu azinji, kuchitisa maulendo yobwereza panango mapfunziro ya Baibolo

• Kukumbusana vomwe tingachite kuti titetezeke, kuchita vinthu mwakankulumize, khalidwe yabwino, kuwona bwino vinthu olo nkhani zinango zolinganako na vimwivi

• Kusankhulako pfunziro panango vidiyo ya mu bulosha yakuti Chitani khama pa kulewenga na kupfunzisa mwabuya

• Momwe tingalimbikisire munzathu watayenda naye mu umboni

• Lemba yomwe ingakathandize polalikira panango chochitika cholimbikisa cha mu umboni