Basa yapadera yolalikira va Ufumu wa Mulungu mu Novembro

Yesu adalengeza ‘ntontholo wabwino wa Ufumu wa Mulungu.’ (Lu 4:43) Iye adawuza soti wanthu kuti ambapempherere Ufumu moyu. (Mt 6:9, 10) M’mwezi wa Novembro, tidzachite vose vatingakwanise kuti tidziwise wanthu va Ufumu wa Mulungu. (Mt 24:14) Konzani ndandanda kuti mudzaphatembo basa mweyi mwakukwana. Wose womwe achada kudzachita upainiya wothandiza, angadzasalule kumala 30 panango 50 ora m’mwezi moyu.

Dzachiteni vose vamungakwanise kuti mudzawonese wanthu azinji mudera yanu mavesi yolewa va Ufumu wa Mulungu. Mukambasalula lemba, mumbaganizire kuti wanthu wa mudera yanu ali mu chipembedzo chiponi. Peno munthu wawonesa chidwi pa ulendo woyamba, mupaseni Ntsanja ya ulonda Na. 2 2020. Yesesani mwakanfulumize kuyambisa pfunziro ya Baibolo pakuphatisa basa mabuku yathu yopfunzisira chidwi chake chikanati kumala. Kasala kanthawe kadiki-diki kuti Ufumu wa Mulungu uchose maboma yose. (Da 2:44; 1Ak 15:24, 25) Ndipomwapa, tichadikana kuchita vose vatingakwanise kuti tiwonese chikhulupiriro chathu kwa Yahova na Ufumu wake!