Kalata yochokera ku Bungwe Yotonga

Okondewa abale na alongo wathu:

Pakuti titumikira Yahova, tikonda maninge Baibolo ndawa yakuti ni mawu yake. Tikudziwa kuti nkhani zake ni chaizo ndipo mpfundo zake ni zothandiza. Tikudziwa pomwe kuti Yahova watipasa Baibolo ndawa yakuti atikonda. (Salimo 119:105; Luka 1:3; 1 Yohani 4:19) Ndise ofunisisa pomwe kuthandiza anango kuti adziwe mpfundo za chonadi zomwe ziri m’Mawu ya Mulungu. Ndipomwapa ndise wokondwa kubulisa bukhu ya msolo wakuti: “Vomwe tinkupfunzira mu nkhani za m’Baibolo.” Manje tindofuna kufotokozako pang’ono viri m’bukhu mwiyi.

Bukhu mwiyi taikonza kuti ithandize wana, koma podiya viri teno, niyothandiza pomwe kwa akuluakulu omwe ankufuna kuidziwa bwino Baibolo. Pakuti Baibolo ni bukhu ya aliyese, ndipomwapa kupfunzira nkhani za m’bukhu mweyi kungatithandize kuti timbakhale okondwa.

Bukhu mwiyi inkufotokoza nkhani za m’Baibolo kundoyambira pomwe wanthu adalengewa. Tayesesa kufotokoza nkhani mwiyi mu njira yosashupa kubva komasoti motewedza nthawe yomwe vinthu mwivo vidachitika.

Koma sikuti bukhu mwiyi ikundofotokoza nkhani za m’Baibolo neye, koma tanemba nkhani mwizi komasoti kukonza mafoto yake munjira yakuti munthu akambawerenga ambakhale ninge akuona vomwe vinkuchitika komasoti kubva momwe wanthu mwawo ambabvera.

Bukhu mwiyi itithandize kuona kuti Baibolo ifotokoza va wanthu omwe adabvera Yahova na omwe alibe kumubvera. Ndipo itithandize kuona vomwe tingapfunzire kwa wanthu mwawa. (Aroma 15:4; 1 Akorinto 10:6) Bukhu mwiyi iri na vigawo 14. Kumayambiriro kwa chigawo chirichose kuli mawu yofotokoza vomwe tingapfunzire mu chigawo mwicho.

Peno ndimwe m’bereki muwerenge na wana wanu msolo uliwose nkukambirana mafoto yake. Patsogolo pake mungawerenge pomwe mavesi ya m’Baibolo, pomwe pachokera nkhani mwiyo. Mukachita teno, mungathandize wana wanu kuona kubverana pakati pa vomwe mwawerenga m’Baibolo na vomwe mwapfunzira mu nkhani mwiyo. Njira mwiyi ingathandize pomwe peno munkukambirana na munthu yemwe akufuna kuidziwa bwino Baibolo.

Tikukaikiralini kuti bukhu mwiyi ithandize pomwe wana na akuluakulu kubodzi, kuti apfunzire mpfundo za m’Mawu ya Mulungu nkumbaziphatisa basa pa moyo wawo ndipo vimwevi vingathandize kuti nawombo akhale m’banja ya Mulungu nkumbamutumikira.