Chimo ya Mpfumu Davide

Sauli padafa, Davide adakhala mpfumu. Iye adayamba kutonga na magole 30. Ntsiku inango ali pantsodzi ya nyumba yake adaona nkazi wokhuza. Padafagafaga adagumana kuti dzina yake wenze Bati-seba ndipo wenze nkazi wa Uriya. Davide adachemeresa nkazi muyo ndipo adagona naye. Padazindikira kuti nkazi muyo anamimba, Davide adafagafaga njira yakuti chimo yake ireke kudziwika. Iye adauza nkulu wa masocha kuti aikhe Uriya kutsogolo nkumusiya kuti aphewe. Vimwevi vidachitikadi ndipo Davide adalowola Bati-seba.

Koma Yahova ambaona vose mwevi. Ko manje adachita tani? Iye adatumiza Natani kuti akakambirane na Davide va nkhani mwiyo. Natani padafika kwa Davide adalewa kuti: ‘Penze munthu munango wolemera yemwe wenze na nkhosa zizinji. Manje penze pomwe munthu munango wosauka yemwe wenze na kankhosa kabodzi kokha, wosauka moyu ambakakonda maninge kankhosa kake mwaka. Manje munthu wolemera ule, adatenga kankhosa ka wosauka ule.’ Davide padabva vimwevi adakalipa maninge ndipo adalewa kuti: ‘Munthu moyu achadekana kufa basi.’ Natani adauza Davide kuti: ‘Munthu wolemera uyo ndimwepo.’ Davide padazindkira vomwe Natani ambatanthauza, adadzibvera ntsisi maninge. Manje adauza Natani kuti: ‘Nachimwira Yahova.’ Chimo mweyi idamubweresera mabvuto Davide pabodzi na banja yake. Yahova adamulanga Davide koma alibe kumupha ndawa yakuti adadzichepesa komasoti adalapa mochokera pasi pa ntima.

Davide ambafuna kumanga kachisi wa Yahova. Koma Yahova adasankhula mwana wake Solomo kuti ndiye adzamange kachisi muyo. Davide adayamba kusonkhanisa vinthu vakuti Solomo adzaphatise basa pakumanga. Iye adalewa kuti: ‘Kachisi wa Yahova ankufunika kudzakhala wokhuza maninge. Pakuti Solomo akali mwana, nimuthandize kugumana vinthu vomangira kachisi moyu.’ Patsogolo pake, Davide adapereka kobiri zizinji zakuti zidzathandize pa basa yomanga kachisi. Adagumana wanthu wabuya komasoti adasonkhanisa golide na siliva uzinji. Patsogolo pake adasonkhanisa matabwa ya muti wa nkungudza yochokera ku Tulo na ku Sidoni. Davide padasala pang’ono kumwalira, adapasa Solomo mapa ya kachisi. Adalewa kuti: ‘Yahova adaniuza kuti nikunembere mapa iyi. Ayi kuchita mantha ndawa iye akuthandize, limba ntima ndipo yamba kuphata basa mweyi.’