Yakobo adatambira madaliso

Pomwe wenze na magole 40, Isaki adalowolana na Rabeka ndipo ambamukonda maninge. Kuyenda kwa nthawe Rabeka adakhala na mimba ndipo adabereka wana awiri wamapasa.

Adayamba kubadwa wenze Esau ndipo wachiwiri wenze Yakobo. Esau ambakonda kuyenda n’thengo kukasodza nyama, koma Yakobo ambakonda kuphata basa zapamuyi.

Pa nthawe mweire baba akamwalira mwana woyamba ndiye ambapasiwa vinthu vizinji komasoti kobiri zizinji za banja mwiyo. Vomwe ambapasiwa ivo vimbachemerewa kuti cholowa. M’banja ya Isaki cholowa mwecho chimbaphatanidzapo vomwe Yahova adapolomisa Abulahamu, Esau ambaganiziralini va mapolomisi mwayo, koma Yakobo ambaona kuti mapolomisi mwayo niyofunika maninge.

Ntsiku inango Esau adayenda kokasodza ndipo adabwera ali woneta maninge komasoti wenze na njala. Adagumana Yakobo ankuphika mphodza ndipo adabva kunukhira kwa mphodza mwizo. Iye adauza Yakobo kuti: ‘Nipaseko mphodza izo njala yanipweteka maninge! Yakobo adamudawira kuti: ‘Nikupase, koma unipolomise chakuyamba kuti nidzatambire madaliso yako.’ Apa manje Esau adalewa kuti: ‘Inepano vamadaliso ayo niribe navo basa, tenga madaliso ayo inepano vomwe tinkufuna ni kudya.’ Ko unkuganiza kuti pamwapa Esau adachita bwino? Neye, tinkulewa tene ndawa yakuti iye adapereka chinthu chofunika maninge kuposha chakudya.

Isaki padakalamba, idafika nthawe yakuti apereke madaliso kwa Esau ndawa yakuti wenze nkulu. Koma Rabeka adathandiza Yakobo kuti atambire madaliso mwayo. Esau padadziwa kuti Yakobo watambira madaliso yake adakalipa maninge ndipo ambafuna kupha m’bale wake moyu. Isaki na Rabeka adateteza Yahobo ndipomwapa adamuuza kuti: ‘Yenda ku Harana kwa amalume wako a Labani. Ukakhale kumuko mpakana ntima wa Esau ukhale m’malo.’ Yakobo adabvera vomwe azibereki wake adalewa ndipo adayenda ku Harana.