Ko mabukhu yathu yachanembewa na kutsumbudzuliriwa tani?

Na chakulinga cholalikira bwino ‘ntontholo wabwino’ ku ‘ntundu uliwose, fuko, chiseweredwe na wanthu wa khaindi iliyose,’ tichakonza mabukhu muviseweredwe voposha 750. (Chivumbulutso 14:6) Ko tichakwanisa tani basa mweyi yoshupa? Mwakuthandiziwa na gulu yokonza na wotsumbudzulira padziko yose. Wose mwawa ni wa Mboni za Yahova.

Nkhani zoyamba zichanembewa mu Inglês. Bungwe yotonga ichanyang’anira basa yokonza nkhani zoyamba ku likulu yathu yapadziko yose. Dipatimenti mweyi ichagawira basa kwa wokonza nkhani zoyamba ku likulu yathu yapadziko yose na nthambi zinango. Kukhala na gulu ya abale wosiyana–siyana wapadziko yose kuchatithandiza kuti tinembe nkhani zolemekeza vikhalidwe vosiyana-siyana, vomwe vinkukopa chidwi cha wanthu wa madziko yosiyana-siyana.

Nkhani zichatumiziwa kwa wotsumbudzulira. Akamaliza kunemba na kubvumiziwa, nkhani mwezi zichatumiziwa kwa magulu yotsumbudzulira padziko yose, iwo achatsumbudzulira, achawona peno vanembewa bwino ndipo achabwerezera soti. Iwo achachita khama kuti atsumbudzulire bwino-bwino ‘mawu ya chowonadi’ kuti maganizo yalingane na momwe viri ku Inglês. —Mlaliki 12:10.

Kompiyuta ichafambisa vinthu mwankakulumize. Koma sikuti kompiyuta ingachite vose yokha. Pachadekana wokonza na wotsumbudzulira. Podi kuti viritene, basa yawo ingakulumize mwakuthandiziwa na bukhu yofotokoza mawu (dicionário), pologalama ya kompiyuta na vinthu vinango vofagira. Mboni za Yahova zidakonza sisitimu yodziwika kuti: Multilíngue (MEPS), yomwe ichasewenzesewa potsumbudzulira muviseweredwe vizinji. Ndawa ya sisitimu mweyi, mawu yachaphatanidziwa na mafoto kuti viyende kukadindiwa.

Ndawa chani tichaphata basa mweyi, mpakana kutsumbudzulira viseweredwe vomwe vichayankhuliwa na wanthu adiki-diki? Ndawa ni vomwe Yahova achada ‘kuti wanthu wa khaindi iliyose apulumuke nakuti adziwe chowonadi.’ —1 Timoteyo 2:3, 4.

• Ko mabukhu yathu yachakonzewa tani?

• Ndawa chani tichatsumbudzulira viseweredwe vizinji?