Ko tichathadiza tani abale wathu pa nthawe ya mabvuto?

Pakachitika ngozi, Mboni za Yahova mwankakulumize zichakonza vakuti abale wawo womwe agwerewa na ngozi athandiziwe. Khama mweyi ichawonesa kuti tinachikondi chaicho kwa aliyese. (Yohane 13:34, 35; 1 Yohane 3:17, 18) Ko tichathandizana tani?

Tichathandiza mwa kupereka mali zathu. Pomwe Akhrisitu woyambirira wa ku Yudeya adagumana na njala ikulu, Akhrisitu wa ku Antiyokeya adawatumizira chakudya na mali abale wawo. (Machitidwe 11:27-30) Mwakulingana na mwevi, tikabva kuti abale wathu kunango ankugumana na mabvuto, tichatumiza mali zathu mwa kupereka kumpingu kuti zitumiziwe kwa wale womwe ankugumana na mabvuto yakulu. —2 Akorinto 8:13-15.

Tichathandiza na vinthu. Akulu womwe ali kumpingu komwe kwachitika ngozi achawonesesa kuti aliyese alibwino. Komiti yowona va wanthu ichanyang’anira na kupereka chakudya, madzi yabwino, vovala, pokhala na chithandizo cha mankhwala. Mboni za Yahova zizinji zomwe zinaluso inango zichadzipereka mwakuda kwawo nkuyenda ku malo komwe kwagumanika bvuto kuti akathandize wanthu panango kukamanga nyumba na Nyumba za Ufumu zodzongeka. Chibverano chatinacho ninge gulu chichatithandiza kuyenda kankulumize kukathandiza abale wathu. Podi kuti tichathandiza womwe ‘ni abale wathu wawuzimu,’ tichathandiza soti anango vikakhala vokwanisika, vilibe basa kuti ni watchetchi zinango. —Agalatiya 6:10.

Tichawathandiza mwawuzimu na mwakuthupi. Wanthu womwe agumana na ngozi zachilengegwe achadikana kukhazikiwa moyo pasi. Pa nthawe ninge mweyi, iwo angalimbikisiwe na Yahova, ‘Mulungu yemwe achatitonthoza munjira iliyose.’ (2 Akorinto 1:3, 4) Tichafotokozera wanthu womwe agwerewa na bvuto va chidikhiro chogumanika m’Baibolo, ndipo achakhala na chitsimikizo chakuti Ufumu wa Mulungu ndiwo udzamalise matsoka yose yachilengedwe yomwe yachabweresa mabvuto kwa wanthu. —Chivumbulutso 21:4.

• Ko Mboni za Yahova zichakwanisa tani kuthandiza mwakankulumize kukachitika ngozi?

• Ko tingawakhazike tani moyo pasi womwe apulumuka pa ngozi?