PFUNZIRO 3

Vomwe vidachitika kuti chowonadi cha m’Baibolo chidziwike pomwe

Gulu ya amuna inkupfunzira Baibolo mu 1870 — Wopfunzira Baibolo mu 1870

Mwamuna ankulewenga Ntsanja ya Ulonda yoyamba kudindiwa — *Nsanja ya Olonda* yoyamba kudindiwa mu 1879

Nkazi waphata Nsanja ya Olonda na Galamukani! — *Nsanja ya Olonda* ya ntsiku zino

Baibolo yenze idaleweratu kuti Khristu akadzati wafa, akhrisitu anango adzakhale aneneri wabodza ndipo adzasokoneze chowonadi cha m’Baibolo. (Machitidwe 20:29, 30) Nkuyenda kwa nthawe, vimwevi ndivo vidadzachitikadi. Iwo angasakaniza vipfunziso va Yesu na mabodza ya ku vipembedzo vonyenga. Pamwapa ndipo padayambira vipembedzo vabodza. (2 Timoteyo 4:3, 4) Ko tingatsimikize tani kuti ntsiku zino tinkubvesesa chaivo vomwe Baibolo ichapfunzisa?

Nthawe yakuti Yahova adziwikise chowonadi. Yahova wenze adaleweratu kuti ‘ntsiku zomalizira, chowonadi cha m’Baibolo chidzadziwike.’ (Danieli 12:4) Mu gole ya 1870, gulu idiki-diki ya wanthu womwe angafaga chowonadi idazindikira kuti vomwe matchetchi yazinji yangapfunzisa vingachokeralini m’Baibolo. Pamwapo iwo adayamba kufaga-faga kuti adziwe chowonadi chaicho cha m’Baibolo, ndipo Yahova adawadalisa.

Wanthu wachidwi adapfunzira Baibolo mwakhama. Wopfunzira Baibolo wakhama angaphatisira basa njira yopfunzirira Baibolo yomwe ntsiku zino tinkuyiphatisirambo basa. Iwo angapfunzira Baibolo mwakuyendera msolo wa nkhani. Akagumana nkhani ya m’Baibolo yoshupa kuyibvesa, iwo angafaga-faga m’mavesi yanango kuti aibvese. Akatsimikizira kuti mpfundo yomwe agumana inkubverana na malemba yanango, iwo ambanemberatu. Pakubvuma kuti Baibolo imbadzifotokoze yokha, iwo adadziwa chaivo pankhani ya dzina ya Mulungu, Ufumu wake na cholinga chake kwa wanthu na dziko yapasi, momwe wakufa aliri na chidikhiro cha kumusiwa kwa wanthu. Kufaga-faga kwawo kudawathandiza kuti amasuke ku vikhulupiriro vabodza. —Yohane 8:31, 32.

Mu gole ya 1879, gulu ya wopfunzira Baibolo yenze idazindikira kale kuti achadekana kuphata basa yolalikira mwakhama maninge. Ndipomwapa, kuyambira gole mwiyo adayamba kukonza Nsanja ya Olonda Yolengeza Ufumu wa Yehova, yomwe nalero tidakaiphatisa basa. Ntsiku zino tinkufalisa chowonadi cha m’Baibolo m’madziko yokwana 240, mu viseweredwe voposha 750. Venze vikalibe vachitikako kuti chowonadi chifalikire tene!

Ko nchani chidachitikira chowonadi pomwe Khrisitu adafa?
Ko nchani chidachitika kuti chowonadi chidziwike pomwe?