Ko Mboni za Yahova ni wanthu wotani?

Ko muchadziwa wanthu angasi wa Mboni za Yahova? Anango panango navizinyu wanu, muchapfunza nawo pabozi kushikola, panango muchaphata nawo basa pabodzi. Panango imwepo mudachezako kale na m’bodzi wa ise va m’Baibolo. Tsono ndise mbani maka-maka, ndipo ndawa chani tichawuza anango vatichakhulupirira?

Tili ninge wanthu wose. Ndise wochokera kosiyana-siyana, vochita vosiyana-siyana na viseweredwe vosiyana-siyana. Anango wa isepano enze mu vipembedzo vinango, ndipo anango angakhulupiriralini kuti kuli Mulungu. Koma tikalibe tasalula kukhala wa Mboni za Yahova, tose tidakhala na nthawe yopfunzira bwino-bwino vomwe Baibolo ichapfunzisa. (Machitidwe 17:11) Tidakhulupirira vomwe tidapfunzira, ndipo patsogolo pake tidasayina kutumikira Yahova Mulungu.

Tichaphindula ndawa yopfunzira Baibolo. Ninge mwavilili na wanthu wose, tichagumanambo na mabvuto. Koma tidawona kuti tikambaphatisa basa mpfundo za m’Baibolo ntsiku iliyose, moyo uchachinja ndipo vinthu vichatifambira bwino. (Salimo 128:1, 2) Chimwichi ni chibodzi mwa vifukwa vomwe vichatichitisa kumbawuza wanthu vomwe tichapfunzira m’Baibolo.

Tichakhala mobverana na mpfundo za Mulungu. Mpfundo za makhalidwe yabwino zomwe tichazipfunzira m’Baibolo, zichatilimbikisa kumbakhala bwino na kumbalemekeza ayathu, kuyingizira pa kukhala wachilungamo na wachifundo. Izo zichatithandiza kukhala na thanzi yabwino, kukhala wolimbikira pabasa ndipo zichatilimbikisa kumbabverana pabanja na kumbapewa chigololo. Tichakhulupirira kuti ‘Mulungu alibe tsankho,’ ndipomwapa podiya kuti ndise wosiyana khayindi panango tichakhala m’madziko yosiyana-siyana, kubverana kwathu ni kwa padziko yose, ndipo tichasalulanalini ndawa tichakhulupirira vibodzi. Olo kuti tili ninge wanthu wose, ndise gulu yapadera. —Machitidwe 4:13; 10:34, 35.

• Ko Mboni za Yahova nizolingana tani na wanthu wose?

• Ko kupfunzira Baibolo kwathandiza tani Mboni za Yahova?