Kalata yochokera ku Bungwe Yotonga

Abale wa pamoyo olengeza ntontholo wa Ufumu:

Linganizani kuti imwepo ndimwe m’bodzi mwa atumi ndipo mwaimirira pa Phiri ya Maolivi. Patsogolo pake, Yesu ankuwonekera pamaso panu ndipo pasala pang’ono kuti ayenda kudzulu iye ankunena kuti: “Koma mukadzatambira mzimu uchena, mudzakhale na mphanvu. Ndipo mudzakhale mboni zangu mu Yerusalemu, ku Yudeya kose na ku Samariya, mpakana kumamaliziro ya dziko yapasi.” (Mac. 1:8) Ko mudakachita chani?

Panango mudakachita mantha ndawa ya kukula kwa basa mweyo. Komasoti mudakadzibvudza kuti, ‘ko tingakwanise tani basa yochitira umboni ‘mpakana kumamaliziro ya dziko yapasi,’ pakuti ndise opfunzira ang’onong’ono?’ Panango mudakakumbukira pomwe chenjezo yomwe Yesu adauza ateweri wake usiku wakuti aphewe mangwana yake. Iye adalewa kuti: “Kapolo angakhalelini nkulu kuposha bwana wake. Peno adadzudza inepano, imwembo adzakudzudzeni. Peno aphatisa basa mawu yangu, adzaphatisembo basa mawu yanu. Koma adzakuchitireni vose vimwevi ndawa ya dzina yangu, ndawa yemwe adanituma inepano akumudziwalini.” (Yoh. 15:20, 21) Mukaganizira mawu mwaya mungadzibvunze kuti, ‘Ko tingakwanise tani kuchitira umboni mokwana pomwe wathu ankutidzudza komasoti kutitsutsa?’

Ntsiku zinombo tikhala na mibvunzo ninge mwaya. Ninge Mboni za Yahova, basa yathu nikuchitira umboni mokwana “mpakana kumamaliziro ya dziko yapasi” kwa wanthu wamakhaindi yose.’ (Mat. 28:19, 20) Manje, ko tingakwanise tani kuphata basa mweyi, makamaka tikaganizira vakuti Yesu adaneneratu kuti tidzatsutsiwe?

Bukhu ya vochitika va atumi ichatiuza nkhani yokomedza yolewa va momwe atumi komasoti Akhrisitu anzawo woyambirira adakwanisira kuphata basa mweyi mothandiziwa na Yahova. Bukhu yomwe munkuwerengaiyi yakonzewa kuti ikuthandizeni kupfunzira nkhani yokomenza maninge mweyi. Mudabwe maninge mukaona kulingana komwe kulipo pakati pa atumiki wa nthawe ya atumi na atumiki wake ntsiku zino. Muwone pomwe kuti kulingana moku kukundolewalini va basa yolalikira komasoti dongosolo yomwe titewedza tikambaphata basa mweyi. Tinkukaikiralini kuti tikaona kulingana moku mulimbise chikhulupiriro chanu chakuti Yahova ankupitiriza kutitsogolera mbali ya padziko yapasi ya gulu yake ndipo chikhulupiriro chanu chikhale cholimba maninge.

Tinkukupemphererani ndipo tinkukhulupirira kuti mukambaphunzira bukhu ya Machitidwe, mukhale na chikhulupiriro cholimba chakuti Yahova adzakuthandizeni na mphanvu yake ya mzimu uchena. Ndipomwapa, bukhu mweyi ikulimbikiseni kupitiriza “kuchitira umboni mokwana va Ufumu wa Mulungu” na kuthandiza anango kuti amudziwe Yahova na kukhala na chidikhiro cha kudzagumana moyo wosapera.—Mac. 28:23; 1 Tim. 4:16.