Mvuaji, Kuatesenu An’enu ha Gubinga

Mvuaji jiana gunemesa Nzambi jiana gutshigina egi an’awo abue akombeledi a gujinginyina a Yehowa. Mvuaji jiajiya gukuatesa an’awo ha gubua akombeledi a gujinginyina a Yehowa gula adi gualongesa malongo a Biblia sendese ulenge wawo. (Mikh 6:7; Ish 22:6) Yadiago, gutshita ngenyi guana gutoga gudihana. Uvi ha guheta ishimbigo yene yana gutoga gikhesa giavula.​—3Yone 4.

Mvuaji jiajiya guheta malongo avula mu khadilo dia Yozefe nu Mariya. Akhalele nu “khadilo dia guya givo nu givo gu Yelusalema ha gutshita wano wa Pake”, ngatshima yakhalele guatoga ngolo nu mbongo jiavula. (Luka 2:41) Idi mumonega egi, akhalele musha ndaga jia mu nyuma ha fundo dia thomo mu fami yawo. Luholo lumoshi nji, mangin’owu mvuaji jiajiya gutuameza an’awo mu njila yabonga tangua adi mukalegela ba okazio agasue ha gualongesa mu mbimbi nu guahana gifezegeselo giabonga.​—Ngi 127:3-5.

TALESA VIDEO IDI NU MUTO WA LUMENE EGI AHETELE BA OKAZIO AGASUE HA GULONGESA AN’AWO, GUNGIMA HANENU MVUTU GU MIHU EYI:

• Luholo lutshi Jean nu Sharen akhalele musha ndaga jia Ufumu ha fundo dia thomo tangua akhalele musansa an’awo?

• Mukunda natshi mvuaji jidi naye gulongesa, gutuameza, nu gubalela mona wagasue mugudivua nu ivo yenji?

• Luholo lutshi mvuaji jiajiya gulongesa an’awo ha gubinga ndaga yajiya gulola gutshigina guawo?

• Ikadigilo itshi yana guhana organizasio wa Yehowa wana gukalegela ha gukuatesa an’aye ha gubua mafuta a Yehowa?