LONGO DIA 28
Khala Muhana Mersi Mukunda nu Ndaga Yehowa nu Yesu Akalegele Mukunda nu Aye
Luholo lutshi wajiya gudivua gula futa diaye waguhana kado gabonga? Idi yadiago egi mbawusuanguluga muavula nu mbawukhala hehi ha gumuhana mersi mukunda nu kado gene. Yehowa nu Yesu atuhanele kado gabalega gukoma. Udi mujiya kado gene ba? Luholo lutshi tuajiya guhana mersi mukunda nu kado gene?
1. Luholo lutshi tuajiya guhana Yehowa nu Yesu mersi gu ndaga akalegele mukunda nu esue?
Biblia yana zuela egi: “Muthu wagasue washa gutshigina gudi [Yesu]” wajiya guheta monyo wa mayilago. (Yone 3:16) Gusha gutshigina gudi mukotelesa itshi? Ishigo mukotelesa egi tudi naye phamba gusha gutshigina gudi Yesu, uvi tudi naye nji gutshita ndaga jiko. Tudi naye gumonesa gutshigina guetu mu badesizio tuana zula nu mu ndaga tuana kalagala. (Yakoba 2:17) Gula tuamonesa gutshigina guetu mu makalegelo etu nu mu ndaga tudi muzuela, mbatukolesa ufuta wetu nu Yehowa nu Yesu.—Tanga Yone 14:21.
2. Ndaga itshi ya ndando yana gutukuatesa ha guhana mersi mukunda nu ndaga Yehowa nu Yesu akalegele?
Mu phipha ya suga gutuama egi Yesu afue, wawambelele alandudi’enji ndaga iko adi naye gutshita ha guhana mersi mukunda nu mulambu wenji. Waawambelele ha gudibungisa ha gutshita ndaga imoshi ya ndando yinyi Biblia yana tamega egi: “Gudia gua Fumu gua mu Ngueze,” guana tamegewa luko egi Guwunguluga Gufua gua Yesu. (1 Kolinto 11:20) Yesu wawambelele apostolo enji—nu Aklisto mbaaza gungima diawo—ha gutshita ngenyi ha guwunguluga egi wahanele monyo wenji mukunda nu esue. Yesu wazuelele mukunda nu ndaga yene egi: “Landulenu gukalagala ngenyi ha gunguwunguluga.” (Luka 22:19) Gula waya mu gudibungisa ha guwunguluga gufua gua Yesu, mbawumonesa egi udi muhana mersi mukunda nu guzumba guavula guatumonesele Yehowa nu Yesu.
TUKAMBE GUJIYA NDAGA JIAVULA
Longuga ndaga jiavula jiajiya gugukuatesa ha guhana mersi mukunda nu guzumba guavula guana gutumonesela Yehowa nu Yesu. Tala nji mukunda natshi guwunguluga gufua gua Yesu gudi nu ndando.
3. Itshi tuajiya gutshita ha gumonesa egi tudi muhana mersi?
Tangiza gale egi mudi mu wato, gungima wato wene wabunduga mu muta; uvi muthu mumoshi waguhuluisa. Mbawubuita diago mutshima gu ndaga yagukalegele muthu muene ba? Nga ndo mbawukamba maluholo wajiya gumuhana mersi mukunda nu ndaga yene?
Tudi nu luendu lua guheta monyo wa mayilago handaga Yehowa wana gutuzumba. Tanga 1 Yone 4:8-10, gungima zuelelenu mihu eyi:
Mukunda natshi mulambu wa Yesu udi kado ga ndando?
Luholo lutshi udi gudivua mukunda nu ndaga jiakalegele Yehowa nu Yesu mukunda nu aye?
Luholo lutshi tuajiya guhana mersi gu ndaga Yehowa nu Yesu akalegele mukunda nu esue? Tanga 2 Kolinto 5:15 nu 1 Yone 4:11; 5:3. Gungima dia gutanga verse yagasue, zuelelenu muhu owu:
Ha gutadila verse eji, itshi tuajiya gutshita ha guhana mersi?
4. Landula gifezegeselo gia Yesu
Ndaga iko tuajiya gutshita ha guhana mersi idi gulandula gifezegeselo gia Yesu. Tanga 1 Phetelo 2:21, gungima zuelelenu muhu owu:
Mu maluholo atshi wajiya gulandula muabonga nganyo jia Yesu?
Yesu wakhalele muzumba Mbimbi ya Nzambi, walongesele lukuma luabonga, wakuatesele nji athu ako
5. Wajiya guya mu gudibungisa gua Guwunguluga Gufua gua Yesu
Ha gujiya ndaga jiakalegewe mu gudibungisa gua thomo gua Gudia gua Fumu gua mu Ngueze, tanga Luka 22:14, 19, 20. Gungima zuelelenu mihu eyi:
Luholo lutshi Gudia gua Fumu gua mu Ngueze guakalegewe?
Mapha nu vinyo ana kotelesa itshi?—Tala verse 19 nu 20.
Yesu wana tshigina egi alandudi’enji adibungise ha guwunguluga gufua guenji mbala imoshi mu givo mu date yafuile muene. Hene, Matemue a Yehowa ana gudibungisa hamoshi givo nu givo ha guwunguluga gufua gua Klisto gifua luholo luazuelele muene. Ha gujiya ndaga jiavula jiatadila ndaga eyi ya ndando, tala VIDEO. Gungima zuelelenu muhu owu walandula.
Luholo lutshi gudibungisa gua guwunguluga gufua gua Yesu guana kalegewa?
Mapha nu vinyo ana monesa ndaga imoshi ya ndando. Mapha ana monesa muila watagana wa Yesu wahanele muene mukunda nu esue. Vinyo yana monesa mahatshi enji.
ATHU AKO ANA ZUELA EGI: “Hagula egi uhuluishiwe udi naye phamba gusha gutshigina gudi Yesu.”
Luholo lutshi wajiya gukalegela ndaga jidi mu mukanda wa Yone 3:16 nu Yakoba 2:17 ha gumonesa egi udi naye gutshita ndaga jiko jiavula?
NDAGA WALONGUGA
Tuana hana mersi mukunda nu ndaga jiakalegele Yesu mukunda nu esue tangua tuana sha gutshigina gudi muene, nu tuana gudibungisa ha guwunguluga gufua guenji.
Mihu ya Guvutugila
Gusha gutshigina gudi Yesu gudi mukotelesa itshi?
Luholo lutshi wajiya gumonesa egi udi muhana mersi gu ndaga jiakalegele Yehowa nu Yesu mukunda nu aye?
Mukunda natshi idi nu ndando ha guya mu gudibungisa ha Guwunguluga Gufua gua Klisto?
NDAGA JIKO JIA NDANDO
Gufua gua Klisto guana gututuma ha gutshita itshi?
Longuga ndaga jiavula jiatadila gutshigina nu luholo tuajiya gumonesa gutshigina guene.
“Exerce ta foi dans les promesses de Jéhovah” (Inzo Yaleha ya Mutaledi ya Octobre 2016 ya français)
Tala longo didi muzuela egi: “Je me sens pure et j’aime la vie,” ha gumona luholo gulonguga ndaga jiatadila mulambu wa Klisto guakuatesele mukhetu mumoshi.
“La Bible transforme des vies” (Inzo Yaleha ya Mutaledi ya 1 Aout 2011 ya français)
Tanga longo edi ha gujiya mukunda natshi athu avula anago gudia mapha nu gunua vinyo mu Guwunguluga Gufua gua Yesu.