LONGO DIA 20
Luholo Hungu Diana Tuamezewa
Yehowa gashigo Nzambi wa lumuamua. (1 Kolinto 14:33) Akombeledi enji ajiyilego nji gukhala mu lumuamua. Luholo lutshi hungu dia Uklisto diana tuamezewa? Itshi tuajiya gutshita hagula dituamezewe muabonga?
1. Nanyi udi fumu wa hungu?
“Klisto udi Fumu wa hungu.” (Efeso 5:23) Yesu udi mu dilu, uvi wana tuameza midimo ya akombeledi a Yehowa a ha mavu agasue. Watombele “muhiga wafubidila nu watema”—thundu yazonda ya akulu a gukula mu nyuma; ana tamegewa egi Hunji dia Akulu Atuameji. (Tanga Matayo 24:45-47.) Gifua muakhalele apostolo nu akulu a mu siekle ya thomo gu Yelusalema, Hunji dia Akulu Atuameji diana tuameza mahungu a ha mavu agasue. (Makalegelo 15:2) Uvi athu ene ashigo mafumu a ulondegi wetu. Ana tanga ndaga jidi mu Biblia ha gujiya ndaga Yehowa udi mutshigina egi atshite; ana landula nji utuameji wa Yesu.
2. Ginemo gitshi akulu adi nagio?
Akulu adi Aklisto a mala a gukula mu nyuma, ana longesa ndaga jiana katuga mu Biblia nu ana bamba akombeledi a Yehowa tangua ana guakuatesa nu guahana gikhesa. Ana futshiwa ndo mukunda nu mudimo wawo. Uvi ana tshita nu ‘mutshima wabonga gutuama dia Nzambi. Ana tshitago nu nzala ya guheta gima, uvi ana tshita nu gikhesa giagasue.’ (1 Phetelo 5:1, 2) Akulu ana heta ukuateshi gudi akuateshi a mudimo; matangua ako, ajiya gubua akulu gula atagenesa ndaga jiana togewa mu Biblia.
Hunji dia Akulu Atuameji diana tomba akulu ako ha gubua atadi awendji. Ana tala mahungu avula ha guahana utuameji nu gikhesa. Ana tomba akulu nu akuateshi a mudimo, anyi ana tagenesa ndaga ana toga mu Biblia ha guzula ginemo giene.—1 Timote 3:1-10, 12; Tito 1:5-9.
3. Ginemo gitshi Temue wagasue wana khala nagio?
Athu agasue mu hungu ana ‘tumbuisa jina dia Yehowa’ tangua adi muhana ba komantere mu gudibungisa gua mu hungu nu gulongesa lukuma luabonga gula luholo ludi guene.—Tanga Ngimbo 148:12, 13.
TUKAMBE GUJIYA NDAGA JIAVULA
Longuga ha gujiya gula Yesu udi mutuameji wa luholo lutshi, luholo akulu ajiya gulandula gifezegeselo gienji, nu luholo tuajiya gutumagela Yesu nu akulu.
4. Yesu udi fumu wabonga
Yesu udi gutuhana emvitasio imoshi yabonga ha gumutshigina gifua mutuameji wetu. Tanga Matayo 11:28-30, gungima zuelelenu muhu owu walandula:
Yesu udi mutshigina egi tudivue gikuatshi mu ufumu wenji?
Luholo lutshi akulu ajiya gulandula gifezegeselo gia Yesu? Tala VIDEO.
Biblia yana monesa haphelo luholo akulu adi naye gukalagala mudimo wawo.
Tanga Yeshaya 32:2 nu 1 Phetelo 5:1-3, gungima zuelelenu mihu eyi yalandula:
Luholo lutshi udi gudivua tangua wajiya egi akulu ana tshita ngolo ha gukuatesa athu ako gifua muatshitshile Yesu?
Mu maluholo atshi ako akulu ajiya gulandula gifezegeselo gia Yesu?
5. Akulu ana hana gifezegeselo giabonga
Yesu wana tshigina egi akulu atadile ginemo giawo mu luholo lutshi? Tala VIDEO.
Yesu wahanele mikhuala gudi athu adi naye gutuameza hungu. Tanga Matayo 23:8-12, gungima zuelelenu muhu owu walandula:
Itshi idi guguyitugisa tangua udi mumona gudisha gudi mukatshi dia mikhuala ya Biblia yatadila akulu nu ndaga wana mona gudi mafumu a ikombelelo?
Akulu nu enya fami jiawo ana tshita ngolo ha gukolesa ufuta wawo nu Yehowa
Akulu ana gudisagesa mukunda nu muthu wagasue mu hungu
Akulu ana longesa lukuma luabonga muavula
Akulu ana longesa mu hungu. Ana kuatesa nji ha guweva nu gulonda Inzo ya Ufumu nu midimo iko
6. Tuajiya gulandula utuameji wa akulu
Biblia yana gutumonesa gishina tudi naye gulandula utuameji wa akulu. Tanga Hebelu 13:17, gungima zuelelenu mihu eyi yalandula:
Mukunda natshi Biblia idi muzuela egi tudi naye gutumagela athu adi gututuameza? Itshi udi mutangiza mukunda nu ndaga yene?
Tanga Luka 16:10, gungima zuelelenu muhu owu walandula:
Mukunda natshi tudi naye gulandula utuameji wa akulu ikhale mu ndaga jiazonda?
ATHU AKO ANA ZUELA EGI: “Tuajiya gukombelela Nzambi mu luholo luetu tuatshigina.”
Gubonga gutshi muthu wajiya guheta gula udi mukombelela Nzambi hamoshi nu athu ako mu hungu?
NDAGA WALONGUGA
Yesu udi fumu wa hungu. Tuana suanguluga gulandula utuameji wa akulu ana tuamezewa gudi Yesu, handaga ana gutukuatesa nu ana gutuhana gifezegeselo giabonga.
Mihu ya Guvutugila
Nanyi udi fumu wa hungu?
Luholo lutshi akulu ana kuatesa hungu?
Ginemo gitshi akombeledi agasue a Yehowa adi nagio?
NDAGA JIKO JIA NDANDO
Tala ndaga idi mumonesa egi Hunji dia Akulu Atuameji nu akulu ana gudisagesa muavula mukunda nu Aklisto mangino.
Akuatesele Aphangi mu Gifutshi Giatunyishiwe Mudimo Wetu (4:22)
Longuga ndaga jiavula jiatadila mudimo wana tshita atadi awendji.
La vie d’un responsable de circonscription dans un territoire rural (4:51)
Tanga longo didi mumonesa mudimo aphangi a akhetu ana khala nawo mu hungu.
Tala luholo akulu ana tshita midimo yavula ha guhana aphangi gikhesa.