Mihu Yana Guhula Athu Ana Gutanga Mikanda Yetu

Mukanda wa Mulongeshi 5:8 udi muzuelela utuameji wa athu nga wa Yehowa?

Verse yene idi muzuela egi: ‘Ushigo naye gudihula gula wamona egi, gumbo dienu phutu jidi musagesewa, athu adi mushiya mikhuala ya ndaga jiabonga. Handaga muthu udi nu ufumu wakoma, udi mutalewa gudi fumu muko wamubalega muene, uvi ene agasue mbadi adi mutalewa gudi mafumu ako a abalega gukoma.’—Mulo. 5:8.

Gula tuatadilego matangi a Yehowa gu ndaga eyi, tuajiya gutangiza egi verse eyi idi muzuelela utuameji wa ana a athu. Uvi gula tuatangiza muabonga, verse yene idi muzuelela giamatshidia giatadila Yehowa Nzambi wetu, wana gutuwalagana nu wana gutukolesa.

Mukanda wa Mulongeshi 5:8 udi muzuelela fumu munu wana gumonesa phutu lamba nu wanago gutalela milonga yawo. Fumu muene udi naye gujiya gamba, gudi nu muthu muko udi nu ufumu wakoma nu ngolo jiavula jia gutuameza gumubalega muene. Luko, holu diawo hadi nu mafumu ako adi nu ufumu wa gubalega wawo. Ndaga ya gikenene idi egi, mafumu agasue ana gutuameza mangino, ajiya gukhala nu mambo, hene athu avula ana gumona malamba mukunda nu utuameji wawo wabola.

Ikhale tudi mumona egi tushigo luko nu felela, tuajiya guheta ngolo gula tudi mujiya egi Yehowa ‘wana gutala mafumu agasue’ ana gutuameza ha mavu. Tuajiya gutoga ukuateshi gudi Nzambi, nu tudi naye guhaga inemo yetu ha mago enji. (Ngi. 55:22; Fili. 4:6, 7) Tudi mujiya egi: ‘Yehowa wana guwendesa meso enji holu dia mavu agasue ha gumonesa ngolo jienji gudi athu adi muhaga mutshima wawo wagasue gudi muene.’—2 Gudi. 16:9.

Mukanda wa Mulongeshi 5:8 udi gutukuatesa ha gujiya ndaga jiana gukalagala athu ana gutuameza ha mavu, udi nji gutukuatesa ha gujiya egi gudi nu muthu udi nu ufumu wakoma gubalega. Ndaga yabalega ndando idi egi, verse eyi idi gutukuatesa ha gujiya gamba, Yehowa udi diago Fumu wakoma wabalega mafumu ako agasue. Mangino, Ufumu wenji udi mutuamezewa gudi Mun’enji Yesu Klisto. Nzambi wa ngolo jiagasue wana gutala ima yagasue, wana kalagala ndaga jiagasue mu luholo luabonga, Mun’enji Yesu wakhala nji luholo lumoshi.