Mihu Yana Guhula Athu Ana Gutanga Mikanda Yetu

Maphulushi a enya Yuda gu tempelo akhalele akuatshi? Midimo itshi akhalele nayo?

Enya Levi ako anyi akhalelego nganga-nzambi, akhalele nu inemo iko yavula ya gutshita gifua gukhala masuta. Akhalele mutuamezewa gudi kapitene ga tempelo. Muenya ndunge mumoshi mu jina dia Philon wasonegele mukunda nu mudimo wa masuta ene egi: “Enya Levi ako akhalele mumagana gu tuama dia mifulo, ako akhalele mumagana gu mufulo wa fundo dia gijila, hagula nga muthu mumoshi ganginyigo guene gula amuhanelego njila. Ako akhalele muwenda gu khulo ya tempelo ha guyitalela, ako akhalele mutshita mu phipha, ako mu muanya.”

Maphulushi awa a enya Yuda akhalele nji mubamba manzuji a gu Sanhédrin. Phamba ene enya Roma ahanele njila ya gutshita mudimo wa gisuta.

Muenya ndunge mumoshi mu jina dia Joachim Jeremias wazuelele egi: “Tangua maphulushi ajile mukuata Yesu, waahudile egi mukunda natshi atunyile gumukuata tangua gakhalele mulongesa mu tempelo (Mat. 26.55). Gula Yesu waahudile ngenyi, idi mumonega haphelo egi akhalele maphulushi a gu tempelo.” Muenya ndunge muene udi mutangiza egi, maphulushi anyi atumiwe mu giphungu giko ha gukuata Yesu akhalele nji maphulushi a gu tempelo. (Yone 7:32, 45, 46) Gungima, maphulushi nu kapitene gawo atumiwe ha gukuata alandudi a Yesu nu guabata gu Sanhédrin. Yajiya gukhala egi maphulushi anyi ene ahanele mupostolo Phaula gudi thundu ya athu hanze ya tempelo.—Makal. 4:1-3; 5:17-27; 21:27-30.