‘Landulenu Gutangigiza Ndaga Eji’

Ndaga jitshi jiene? Filiphi 4:8 idi muzuela egi landulenu gutangigiza ndaga jia giamatshidia nu jia gutumaga nu jia nduedi, nu ndaga jishigo jia usala nu jia guzumba nu jia lukuma luabonga nu jiabonga gu meso, nu ndaga jidi naye gutumbuishiwa. Ishigo mukotelesa egi Aklisto adi naye gutangiza phamba ndaga jia Biblia. Uvi, tudi naye gutangiza ndaga jidi musuanguluisa Yehowa. Ndaga jiene jishigo naye gulebesa gujinginyina guetu gudi muene.​—Ngi 19:14.

Yajiya gukhala lamba ha gutuna gutangiza ndaga jiabola. Tudi naye gulua nu gubola guetu hakhetu, nu makalegelo abola a Satana, “nzambi yabola ya ha mavu awa.” (2Kol 4:4) Handaga muene udi ha gishina gia ndaga jiavula jiana guzuelewa mu télévision, mu radio, mu Internet, nu mu mikanda iko. Gula tushigo mutomba ndaga jia gutangiza, tuajiya gubolesa matangi etu, gungima dienji tubolesa makalegelo etu.​—Yak 1:14, 15.

TALENU VIDEO TUNA NDAGA JIANA GUBOLESA GUJINGINYINA GUA MUTHU​—GUDIKENESA MU LUHOLO LUABOLA, GUNGIMA HANENU MVUTU GU MIHU EYI:

• 

  Ndaga tshi phangi wakha mutala mu telefone yenji, nu luholo lutshi yabolesa matangi enji?

• 

  Luholo lutshi mukanda wa Galatiya 6:7, 8 nu Ngimbo 119:37 yamukuatesele?