MAKALEGELO A UKLISTO

Mavuala—Dihanenu ‘Mukunda nu Midimo Yabonga’

Mu mukanda Phaula wasonegele Tito mu ukuateshi wa nyuma ya Nzambi, wazuelele egi mavuala, ikhale Tito hakhenji, adi naye gukhala “gifezegeselo gia midimo yabonga mu ndaga jiagasue.” (Tito 2:6, 7, NWT) Gungima, wazuelele luko egi Yesu mbawuphelegetesa akombeledi a Yehowa hagula ajiya ‘gudihana mukunda nu midimo yabonga.’ (Tito 2:14) Gumuanga nu gulongesa lukuma lua Ufumu wa Nzambi gudi mukatshi dia midimo yabonga. Hene, gula udi muvuala, wajiya gukalegela ngolo jiaye ha gubua muvundji wa njila wa tangua diazonda nga wa tangua diagasue ba?—Ish 20:29.

Gula watshigina gubua muvundji wa njila, dilondege muabonga hagula wajiya gusendesa mudimo wa muvundji wa njila. (Luka 14:28-30) Mihu eyi yajiya gugukuatesa: Luholo lutshi mbawuheta ndambo ya makuta ajiya gugukuatesa tangua udi mutshita mudimo waye wa muvundji wa njila? Luholo lutshi mbawutagenesa matangua avundji a njila ana guhana mbeji yagasue? Toga Yehowa agukuatese. (Ngi 37:5) Zuelela ndaga yene nu mvuaji jiaye, nga nu aphangi ana gutshita gale muabonga mudimo owu wa avundji a njila. Gungima, sendesa mudimo wene. Yehowa mbawugushimbiga muavula luholo udi gudihana mu mudimo wenji!

TALENU VIDEO IDI MUZUELA EGI MAVUALA ADI MUTUMBUISA YEHOWA. GUNGIMA, HANENU MVUTU GU MIHU EYI:

Malamba atshi mavuala ako abingile ha gubua avundji a njila? Luholo lutshi abingile malamba ene?
Luholo lutshi mvuaji jiajiya gukuatesa an’awo ha gubua avundji a njila a tangua diagasue?
Mukunda natshi gukhala nu programe ya gulongesa gudi nu ndando?
Luholo lutshi aphangi a mu hungu ajiya gukuatesa muvundji wa njila, nu gumukolesa mu mudimo wenji?
Gubonga gutshi avundji a njila ana guheta?

Phangi mumoshi wa muvuala udi muta maga nu sh’enji mukunda nu mudimo wa muvundji wa njila; phangi mumoshi wa yala wa muvundji wa njila udi mulondega programe yenji; muvundji wa njila mumoshi wa mukhetu udi mulongesa hamoshi nu phangi muko wa mukhetu; muvuala mumoshi wa muvundji wa njila wa mukhetu udi mulongesa muthu Biblia — Luholo lutshi ngajiya gukalagala ha gubua muvundji wa njila?